Tàm càr Dăk Lăk, bơh mờr 3 nam lam lơh, bal mờ bơta kal ke bè broă tam gơl pa sră giáo khoa, tam gơl pa broă bơto bơtê, ală hìu bơsram gam kwi kwơ bơsong broă lơh bè ờ tơl măy mok, phan bơna, mpồl cau pơgru bơto bơtê.

 Nam bơh sơn rờp tơn lơh jat broă lơh bơto bơtê pe kấp nam 2018, càr Dăk Lăk là dùl tàm ală càr kong gơrềng kơn jơ̆ kơn jŭt ngan bơh kòp dờng Kovid-19. Jơh ală tŭ tơngai do, kơnòm bơsram pal bơsram tàm internet. Den tàng, mŭt nam bơsram pơn jat tai, ală hìu bơsram pal roh uă ngan tŭ tơngai nàng bơto bơtê wơl ală jơnau bơsram ai ală kơnòm bơsram in, mờ bal mờ broă ngăc ngar bơyai lơh broă rơndap lơh bơto bơtê mờ bơsram di pal mờ broă lơh bơto bơtê pe kấp pa dê. Ồng Phạm Xuân Mỹ, Kwang atbồ Hìu bơsram phổ thông dân tộc nội trú, kấp bàr kơnhoàl Krông Pách, pà gĭt: Gơrềng tus broă lơh ờs mờng là pal rcang jơnau bơsram lơh tơngŏ ngan ngồn, broă do hìu bơsram neh sồr ală mpồl lơh broă ờs mờng cribơyai ring bal sac rơwah jơnau bơsram cau pơgru bơto bơtê ràng tơlik kơlôi sơnơng ală jơnau bơto bơtê môn bơsram jat môn bơsram mờ sră giáo khoa halà ală sră pơ àr pa dê sồr.

Dùl tàm ală jơnau sồr tŭ lam lơh jat broă lơh bơto bơtê pa là lam bơsram 2 ƀùi dùl ngai, ngan là gơwèt mờ hìu bơsram kấp dùl. Mơya bè hơ̆, uă tiah tàm càr Dăk Lăk kung gam jơnau ờ tơl hìu bơsram, ờ tơl ơdŭ bơsram, ờ tơl măy mok phan bơna bơto bơsram ờ hềt dùl ròt bal jat jơnau sồr dê. Ùr pơgru Hoàng Thị Cúc, cau pơgru Hìu bơsram kấp dùl Trần Quốc Toản, thị trấn Ea Pốc, kơnhoàl Cư Mgar pà gĭt: Tàm tŭ lòt bơto bơsram geh phan ngui tơl làm ai ală cau pơgru in, ai tàm do ală cau pơgru ờ geh phan lơi ờ. Ală cau pơgru mìng bơto bơtê gời lơm, sền tàm sră ià sră nàng kơnòm bơsram in sền tàm hơ̆ mờ bơsram lơm.  Den tàng dùl tiết bơsram bè hơ̆ geh bơh 3 tus 4 âm kơnòm bơsram pa mìng bơsram âm do den bơsram tai âm ndai kal ke ngan ai ală kơnòm bơsram in, ai lời kơnòm bơsram in bơsram tai den ală cau pơgru bơto ờ gŏ thàn ờ.

 Bơdìh hơ̆, bơta ờ tơl cau pơgru gơbàn tàm uă tiah kung gam là bơta kal ke gơwèt mờ gah bơto bơtê càr Dăk Lăk dê. Broă bơto bơtê ală môn tơrgùm bal ala tài bơh môn bơsram bè lài do kung lơh cau pơgru in kwi kwơ ngan, ngan là cau pơgru tàm hìu bơsram kấp bàr. Ồng Phạm Ngọc Lĩnh, Kwang atbồ Hìu bơsram Kấp bàr Ea Tu, xã Ea Tu, ƀòn dờng Buôn Ma Thuột, càr Dăk Lăk, pà gĭt: Mpồl cau pơgru bơh hìu bơsram dê ờ tơl, den tàng bàr pe môn bơsram ai cau pơgru bơto bơtê gam kal ke ngan. Dơ̆ 2 là, ală môn bơsram mùl gŏ ngan tơrgùm bal pơn yơu bè môn khoa học tự nhiên den tŭ do ờ hềt geh cau pơgru bơto bơtê is mờ pal lơh jat broă bơto bơtê bơh 3 nă cau pơgru tơrgùm bal bơto bơtê digơlan là cau pơgru bơto môn Hóa học, lịch sử, sinh học kung bè môn lịch sử, địa lý den tŭ do ờ hềt geh cau pơgru is mờ pal geh 2 nă cau pơgru halà cau pơgru bơto môn lịch sử bơto môn địa lý halà cau pơgru bơto môn địa lý den bơto môn lịch sử.

Jat Sở Giáo dục mờ  Đào tạo càr Dăk Lăk, tŭ do jơh gùt càr gam ờ tơl 1 rơbô 200 nă cau pơgru, cau lơh broă jat jơnau sồr, khà ơdŭ bơsram pal lơh pa di pal mờ jơnau kờñ bơsram 2 ƀùi dùl ngai là mờr 500 ơdŭ. Ală bơta ờ tơl do neh gơrềng uă ngan tus tŭ tơngai kung bè bơta niam lơh jat broă lơh bơto bơtê pe kấp nam 2018 bơh càr dê. Ală hìu bơsram pal rcang lơh is bơto bơtê mờ bơsram jat ală bơta geh ngan lài mờ tŭ càr bơsong geh broă lơh bè phan bơna, măy mok bơto bơsram mờ cau pơgru.