Phó Kwang atbồ Mpồl atbồ rơndăp broă lơh bơcri priă lơh bơt bơtàu broă lơh gùng lòt mờ lơh sa suơn sre càr Dăk Lăk Phan Xuân Bách pà gĭt, tơnơ̆ uă dơ̆ pơyoa jơnau dan, lồi nhai 10 nam 2023, Ƀộ Giao thông Vận tải neh geh kơrnoat tam gơl broă lơh rơndăp broă lơh bơcri priă lơh gùng Hồ Chí Minh gơl gùng pleh đah mat tơngai lik Buôn Ma Thuột.

Jat hơ̆, kờp jơh priă bơcri bơh rơndăp broă lơh neh geh tam gơl bơh 1 rơbô 500 tơmàn đong gơguh tus 1 rơbô 841 tơmàn đong. Khà priă 341 tơmàn đong gơguh tai uă ngan nàng bơtơl tàm bơnah priă ai ù gơlik geh tàm tŭ lam lơh rơndăp broă lơh dê. Tơnơ̆ tŭ geh pà tơl priă, cau tờm bơcri priă neh sồr ală mpồl lơh broă geh gơrềng mhar ngan lơh, ai ù jài, mut lơh jài nàng di mờ tŭ tơngai lơh sir rơndăp broă lơh tàm nam 2024.