Jat jơnau yal tàm pơrjum, bơh nam 2021 tus tŭ do, càr Dăk Lăk neh sền gŏ, kŭp mờr 1 rơbô dơ̆ lơh tìs,  rlau 1 rơbô 400 nă cau lơh tìs mờ dơ̆ lơh tìs adat boh lam bè ma túy; kŭp rlau 3 kĭ heroin mờ mờr 6 kĭ ma túy tơrgùm bal. Jơh gùt càr geh 445 nă cau ngui tìs mờ adat boh lam ma túy, 866 nă cau ngir ma túy geh sră nggal atbồ. Bơh 3 nam lam lơh jat Rơndăp broă lơh, cồng nha broă lơh mblàng yal rcang sơndră ma túy geh bơtàu tơnguh. Uă tơngume, broă lơh, broă lơh mblàng yal geh lơh li la uă.

Tàm pơrjum, ală kwang bàng đơs là, cau lơh tìs ma túy ngai sơlơ lơh broă rơlăc rơlèo, broă lơh mblàng yal, hòi jà nàng làng bol in yờ tơnguh uă bơta rcang sền ngăc, tam dră mờ cau lơh tìs bè ma túy kung pal geh yờ tơnguh uă mờ geh bơta tam gơl di pal. Tàm hơ̆, pal ngui niam bơta dong kờl bơh ală cau kra ƀòn, kwang atbồ ƀòn, cau geh bơngă pin dờn mờ ală cau kơđơng gah jat Yàng dê nàng mblàng yal ai làng bol in bè ală broă lơh jòi jơnau bơh cau lơh tìs dê.