Là dùl tàm ală ơruh pơnu lam lài, ngui broă lơh sa pa, bi Y Luật Niê, kòn cau Rơđê, kis tàm ƀòn Mghí, xã Yang Mao, kơnhoàl Krông Bông, càr Dăk Lăk tŭ do gam gam tơnguh bơtàu broă tam uă bơta tờm chi, ròng uă bơta phan ròng. Tàm bă ù ơnàng rơlao 2 lồ bơh hìu nhă tờm, bi tam bơrlŭ bal uă bơta tờm chi bè zổi, kơphe, sầu riêng, prìt sơkò mờ tờ tơnao ròng ka ơnàng rơlao 100 thơ̆k vuông nàng ròng koăt bàl jù.

Bi gam pơgồp bal kă bro sơntìl phan tam, blơi kơphe ris nàng geh tai priă. Bi Y Luật Niê yal: là đảng viên gam kơnòm să, dờng pràn bơh ală broă lơh đoàn, mpồl lơh broă tàm ƀòn, bi sùm tus bal bơsram, ngui ală broă lơh pa, tơlik nùs nhơm lam lài bơh cau đảng viên dê. “Să tờm añ là đảng viên gam kơnòm să, den sùm geh nùs nhơm kơlôi sơnơng tàm bồ là cau đảng viên lam lài oh mi ƀòn lơgar jăt tơnơ̆. Să tờm den kung geh tus bal sền bơsram uă broă lơh tàm càr mờ bơdìh càr, bơh tŭ hơ̆ rê ngui wơl tàm suơn hìu nhă tờm, gŏ bơta lơi geh cồng nha den mblàng yal nàng làng bol in lơh jăt bal”.

Kung bi Y Luật Niê đơs, tơngai do, geh uă ơruh pơnu tàm xã Yang Mao dờng pràn bơh ală broă lơh đoàn, mpồl lơh broă dê neh geh yal tus bơsram ală ơdŭ jòi git bè Đảng mờ là ală cau jăk geh sền sơwì nàng tơmŭt Đảng. Tàm 7 nam do, Đảng ủy xã neh tơmŭt geh mờr 90 nă đảng viên pa, khà tơnguh bơtàu đảng viên pah nam ndrờm geh mờ gơguh rơlao mờ broă rơndăp lơh geh geh ai. Tus tŭ do, xã Yang Mao geh mờr 300 nă đảng viên pơrjum tàm 18 Ci ƀộ ƀòn mờ ală anih lơh broă, mpồl lơh broă.

Ồng Trần Thế Thành, Ƀí thư Đảng ủy xã Yang Mao pà git, kal ke bal tàm broă tơnguh bơtàu đảng tàm xã là jòi cau nàng bơto bơtơl tơmŭt Đảng. Tài geh uă cau jăk sùm lòt lơh broă ngài, kal ke tàm broă sền nàng git rài kis lơh broă. Bŭ lah bè hơ̆, ală Ci ƀộ neh lơh ngan hòi jà, pơgồp bal mờ ală mpồl lơh broă ndai nàng di tŭ gŏ, dong kờl, bơtơl nàng “ờng sơntìl”, tơnguh bơtàu đảng viên tàm tơl Ci ƀộ. “Pơgồp bal ală broă lơh “Ơruh pơnu lơh broă, cau kơnòm să gàr dà lơgar”, lam lơh ai Đoàn ơruh pơnu bơ̆t bơtàu ală broă lơh sa, hơ̆ sồng hòi jà ơruh pơnu tus pơrjum kung bè tus bal ală broă lơh tàm ƀòn lơgar, bơh tŭ hơ̆ ai geh khà cau, lơh geh mpồl cau nàng oh mi in geh tơnguh bơtàu lơh sa, mờ tus bal broă Đảng, broă tàm ală ƀòn. Bơta kwơ màng là pal geh ai bơta niam nàng ală oh kòn, kòn sao in gam ờ bài mŭt Đảng, ờ bài tàm broă pơrjum cri bơyai. Den tŭ do lơh geh ală mpồl jăt nùs nhơm kờñ gơboh, ai ală oh kòn tus bal sền bơsram broă lơh hơ̆ sồng rê lơh jăt. Bơh ală broă lơh bơh ală mpồl cau tờm ngan do nàng lơh geh uă tus tàm ală ƀòn tàm xã”.

Jăt jơnau đơs bơh Huyện ủy Krông Bông dê, bŭ lah là tiah ngài mờ kal ke, mơya xã Yang Mao sùm là tiah niam tàm broă tơnguh bơtàu đảng viên tàm kơnhoàl Krông Bông dê geh bal bè bơta niam mờ bơta uă. Xã sùm sền gròi tơnguh bơtàu đảng viên là cau gam kơnòm, cau kòn cau. Mờ sền kwơ tàm broă tơnguh uă bơta niam tàm broă pơrjum Ci ƀộ, kung bè bơta niam broă sền gròi, jăt sền tàm dơlam is đảng dê. Bal mờ gơnoar bơh kấp ủy mờ ală ci ƀộ den gơnoar bơh cau lam bồ Đảng ủy là kwơ màng ngan. Ồng Lâm Thanh Tùng, Kwang atbồ Mpồl rơndăp broă Huyện ủy Krông Bông đơs, mờ broă mờng chài neh jŏ nam tàm broă lơh đảng, Ƀí thư Đảng ủy xã Yang Mao neh geh uă broă lơh tàm broă jòi cau nàng tơnguh bơtàu đảng viên. “Xã Yang Mao kung là dùl tiah ngài, tiah geh gal làng bol kòn cau. Broă tơnguh bơtàu đảng viên tàm ală nam do den gơtìp kal ke, gơkòl. Mơya, mờ broă lơh ngan bơh să tờm ồng Thành dê bal mờ mpồl Ƀan Cấp hàñ Đảng ƀộ den tàm ală nam do Đảng ƀộ xã Yang Mao neh sùm lơh niam broă tơnguh bơtàu đảng viên, tàm hơ̆ uă ngan là bơh ală cau là kòn cau. Ală cồng nha do neh pơgồp bal kwơ màng tàm broă dong kờl cau Đảng ƀộ kơnhoàl in lơh gơs ală broă tơnguh bơtàu đảng viên tàm gùt Đảng ƀộ, kwơ màng tàm tiah làng bol kòn cau”.

Sền gròi nền nòn, lơh broă bal mờ ală mpồl lơh broă mờ đềt mềr bal mờ làng bol neh dong kờl ală Ci ƀộ, Đảng ƀộ tàm xã Yang Mao di tŭ gŏ, bơto bơtơl cau jăk nàng tơmŭt Đảng, tơnguh uă mpồl đảng viên tàm xã. Tŭ neh geh mŭt tàm mpồl Đảng, tơl nă đảng viên sùm tơnguh uă nùs nhơm sơrlèt mờ ală kal ke nàng tơnguh bơtàu lơh sa, lam lài tàm ală broă lơh ƀòn lơgar dê. Tơnguh uă nùs nhơm lam lài tàm broă bơ̆t bơtàu ƀòn lơgar pa, pơgồp bal tàm broă bơ̆t bơtàu ƀòn lơgar ngai sơlơ tơnguh bơtàu.