Mùl màl, ală kâp ƀộ đoàn tàm gùt càr neh lơh 17 nơm hìu tàm kờñ gơboh bal kòn bơnus, hìu khăn quàng pơrhê, lơh 17 kơi sồ broă lơh Sòl àng gùng ƀòn, 23 tiah nhơl ñŏ ai kơnòm dềt in; dong kờl uă tùh sră ai kơnòm dềt in; sờng, lơh niam wơl git nđờ jơt nơm hìu niam chài, hìu mpồl bơtiàn. Ală broă lơh “Ngai dơ̆ 7 lơh broă dong kờl is”, “Ngai rlô tơlir gùt lơgar” geh bơyai lơh dơ̆ lĕ bal, gơ hòi gơ jà gal ngan đoàn viên, ơruh pơnu tus bal mờ broă lơh sền gàr tiah ơm kis, rơcang sơndră mờ tam gơl trồ tiah tàm ală tiah.

Lòt bal mờ broă lơh gàr lơngăp lơngai rài kis mpồl bơtiàn, lơh broă dong kờl is tài mpồl bơtiàn, ală kâp ƀộ đoàn gùt càr neh jàu pà rlau 20 rbô bơnah phan pà, mờr 3 rbô bơnah priă dong kờl bơsram, rơndeh coh ai làng bol, kơnòm dềt in; lam lơh kham sơm kòp ờ sa priă tàm ală tiah sar lơgar ngài, tiah kal ke. Kờp jơh khà priă ală broă lơh dong kờl is là rlau 10 tơmàn đông.