Ồng Y Bhăng Mlô, ơm tàm xã Ea Tul, kơnhoàl Cư Mgar geh 1 lồ nggùl kơphe gam tàm tơngai pik  tàm tiah dà croh ƀòn Sah A, rềp nhàr mờ xã Cư Dliê Mnông. Do là tiah ngài, ờ geh cau, ală nam lài sùm gơlik geh bơta bol blơ̆ mut pik kơñau kơphe pa dum. Ồng Y Bhăng yal, ai mờng chài bơh ală nam lài, nam do, ală hìu bơnhă geh kơphe tàm tiah do neh rơcang lài pơgồp bal mờ kwang àng xã lơh anih gròi sền làm bă tiah nàng sền gàr suơn kơphe. Pah ngai, anih gròi sền do ndrờm lam lơh lòt sền, ơm gak, sền gàr kơphe tàm mìr, ngan là tàm trồ mang. Den tàng, bơta pik kơñau kơphe pa dum neh ờ gam gơlik geh tai. Ồng Y Bhăng đơs: “Anih gròi sền do geh 2 nă cau pơgồp bal mờ mpồl kwang àng xã, pah tŭ tus trồ mang den oh mi lòt sền tàm tiah rềp nhàr đah xã Cư Dliê Mnông mờ xã Ea Tul, lòt sền bơh mang tus 9 jơ den rê dùl thoa, mờ tus 11 jơ halà 11 jơ 30 phuk mang den lòt sền tai mờ tŭ àng drim gờñ pơgap 1, 2 jơ drim den hơ̆ sồng rê. Ală bol blơ̆ kơñau gŏ oh mi ơm gak mờ sền gàr gùt mang den khi rơngòt, ờ khin mut tàm suơn pik kơñau tai”.

Ea Tul là xã geh bă kơphe uă ngan rlau jơh kơnhoàl Cư Mgar mờ rlau 2 rbô lồ. Thiếu tá Đặng Trọng Minh, Kwang atbồ Kwang àng xã yal, xã geh 10 ƀòn mờ 1 thôn. Ală thôn, ƀòn tŭ do ndrờm neh geh crăp camera sền gàr lơngăp lơngai mờ bơta lơngăp lơngai geh sền gàr niam. Bulah bè hơ̆, ală nam lài, xã kung gam sùm gơlik geh ală dơ̆ pik kơñau kơphe tàm mìr, ngan là tàm ală tiah ngài ƀòn làng bol ơm kis. Tềng đap bơta geh ngan do, kwang àng xã neh tă pơgồp jơnau đơs ai Đảng ủy xã in lơh ală anih gròi sền làm bă tiah, lam lơh lòt sền, ơm gak, sền gàr kơphe ai làng bol in jơh gùt tơngai pik tơnhàu. Thiếu tá Đặng Trọng Minh đơs: “Bol hi lơh bơh 3 tus 4 anih gròi sền làm bă tiah, tơl anih gròi sền geh bơh 3 tus 5 nă cau, lơh tàm ală tiah mìng tam kơphe, halà tàm ală tiah mờ làng bol yal là roh kơphe, hơ̆ là ală tiah geh bơta pik kơñau den mpồl geh mat bơsong mơ tơn. Gơnoar broă bơh kwang àng dê là tờm, mờ gam geh tai ală mpồl, gah broă lơh, mpồl cau tàm xã bè ala mat ling grăp ƀòn xã, đoàn ơruh pơnu, mpồl cau lơh broă sa, cau ling yau, mặt trận mờ jơh bal làng bol geh kơphe bal mờ gơp tus bal ơm gak, sền gàr kơphe làng bol in”.

Kàl lơh kơphe 2023- 2024, gùt càr Dăk Lăk geh mờr 213 rbô lồ kơphe, cồng nha tơnhàu kờp bal geh bơh 2 tấn 6 tus 2 tấn 8 dùl lồ, khà tơnhàu geh mờr 550 rbô tấn, pik sùm tus nggùl nhai 1 nam 2024. Tơngai do digơlan geh mờr 200 rbô nă cau lơh broă tàm ală càr tiah đah tô, tiah tàm gùl lơgar… tus Dăk Lăk nàng pik ơpah kơphe. Tài khà cau gơguh uă, tơrgùm tàm dùl tŭ tơngai lơyah, bơta lơngăp lơngai gơlik geh kal ke.

Thượng tá Phan Thanh Cường, Kwang atbồ Cơldŭ Hìñ sự Kwang àng càr Dăk Lăk pà git, lơh jat jơnau đơng lam bơh Kwang àng càr Dăk Lăk dê bè rơcang sơndră ală bơta cau tìs koh kơl aniai halà pik kơñau kơphe kàl nam do,c ơldŭ neh tă pơgồp jơnau đơs ai kwang àng càr in lam lơh ring bal ală broă lơh bè: Pơgồp bal mờ kwang àng ală kơnhoàl, thị xã, ƀòn dờng atbồ niam ală cau geh pin tàm ală tiah, ờ lời gơlik geh ală broă lơh tìs; sồr ala mat ală anih blơi phan lơh gơs bơh suơn sre tàm càr bañ blơi kơphe lir, kơphe ờ git loh bơh lơi geh tài bơh tung kơñau mờ geh bơh ală bol blơ̆ kơñau dê; mblàng yal, hòi jà làng bol tơnguh jơnau rơcang ngac, jơh nùs kơryan, yă ală bơta cau tìs nàng rơcang sơndră lài bơh ngài, pơgồp bal mờ ală mpồl, gah lơh broă tàm càr lam lơh lòt sền, sền gàr phan bơna làng bol dê… Thượng tá Phan Thanh Cường yal 2, 3 kơnòl broă tờm bơh mpồl dê tàm broă kơryan ală bơta cau tìs tàm kàl lơh kơphe 2023- 2024: “Cơldŭ kảñ sát hìñ sự neh rơcang lài bơt bơtàu broă rơndap lơh rơp tơrgùm kờp sền jơh ală cau lơh broă bơh ală tiah ndai tus lơh ơpah nàng atbồ, rơcang sơndră bơh ngài, ờ lời ală cau geh pin lơh tìs adat boh lam, tung kơñau phan bơna halà lơh aniai phan bơna. Bơh hơ̆ sền gàr lơngăp lơngai, nàng làng bol in iang nùs lơh sa pik kơphe kàl 2023- 2024 do”.