Dăk Lăk tŭ do geh 2 rơndăp broă lơh FDI bơh cau bơcri priă lơgar Nhờk dê lơh. Bơdìh mờ hơ̆, Anih lơh broă Lơh broă bal dunia lơgar Nhờk (JICA) neh dong kờl ai càr Dăk Lăk in lơh jat 21 broă lơh, rơndăp broă lơh ODA mờ kờp jơh khà priă rlau 24 tơlak dolar Mỹ, tơrgùm tàm lă gah gùng che ồs đèng, gùng lòt, pà dà mờ bơtơ̆t rbòng dà. Bơh nam 2001 tus tŭ do, càr neh dờp 22 bơnah priă dong kờl ờ di Cíñ phủ bơh 3 nă cau dong kờl lơgar Nhờk dê mờ kờp jơh khà priă rlau 1 tơlak 600 rơbô dolar Mỹ. Ală Mpồl lơh sa kă bro càr Dăk Lăk tŭ do tăc phan tus drà kă bro lơgar Nhờk uă gah phan bè kơphê gar, kơphe klài lề, nsồp lơwe, ka kao, mắc ca. Tàm 5 nam do, Mpồl lơh bơyô bal đah lơgar Việt Nam mờ Nhờk càr Dăk Lăk neh tàm tơrbŏ, pơndờm pơnđiang dong kờl ờ di Cíñ phủ bơh lơgar ndai mờ kờp jơh khà priă mờr 4 tơmàn 600 tơlak đong.

Tàm Pơrjum dờng, Mpồl lơh bơyô bal đah Việt Nam mờ Nhờk càr Dăk Lăk tơngai lơh broă bơh nam 2023- 2028 gĭt nền, tàm tơngai lơh broă tus, Mpồl tơrgùm sơlơ yal tơngĭt jơnau lơgar ndai, tơnguh uă uă cồng nha ală broă lơh ring lơngai, tam klăc bal, lơh bơyô bal mờ lơh broă bal đah Việt Nam mờ Nhờk tàm càr dê; pơn jat tai tơnguh uă cồng nha ală broă lơh dong kờl ờ di Cíñ phủ bơh lơgar ndai.