Jat jơnau yal bơh Sơnĕ nhơl chờ mờ hìu nac Biệt Điện tàm ƀòn dờng Buôn Ma Thuột, càr Dăk Lăk dê, bơh ngai 10/02, sơnĕ do ngan ngồn tơn jơh broă lơh hàu rơ was tàm tiah nhơl chờ Rbàng yồng Buôn Đôn tàm xã Krông Na, kơnhoàl Buôn Đôn; ala mờ ală phan nhơl chờ pa cèng bơta niam chài krơi is ƀòn lơgar dê gơ jat bal mờ ală broă lơh nhơl chờ rềp mềr mờ rơ was mờ ai rơ was lòt nhơl, nhơl ñŏ mờ nac nhơl chờ. Broă lơh do nàng kờñ lam lơh gùng dà bơh càr Dăk Lăk dê bè broă rơndap lơh ơm broă lơh nhơl chờ hàu rơ was tàm broă lơh kă bro nhơl chờ nàng sền gàr rơ was bơh càr dê, tam gơl rơhời gơs broă lơh nhơl chờ rơ was rềp mềr.

Kung rơ rềng tus broă rơndap lơh do sơl, tàm broă lơh Chờ rơ was Buôn Đôn- Dùl tàm ală broă lơh tờm bơh Dơ̆ lơh chờ kơphe Buôn Ma Thuột dơ̆ 8 nam 2023 geh lơh tàm nhai 3 tus do tàm Dăk Lăk, geh ờ geh ală broă lơh bè: pơrlòng rơ was ntoat, pơrlòng rơ was re dà, pơrlòng rơ was coh plai, ờ pơrlòng rơ was dŏ che mờ kòn bơnus. Ala mờ hơ̆ geh 2, 3 tơngume bè: Lơh yàng hòi dan pràn kơldang să jan rơ was in, ai rơ was tus bal dơ̆ iờ sa buffet, pơrlòng bong bơka muh mat să jan rơ was in, pơrlòng rơ was lùp lap cau sền, ai rơ was cùp hin mờ cau sền, nac nhơl chờ… Ồng Vũ Minh Thoại, kwang atbồ cơldŭ niam chài- yal tơnggit jơnau kơnhoàl Buôn Đôn pà git: “Bơta do kung là lơh jat jơnau hơ pơrgon bơh Ủy ƀan Zân càr dê mờ Mpồl phan kis câu Á. Do là dùl gùng dà mờ nùs nhơm niam ngan. Bol hi kung kơp gơn ngan tài đơs ngan tŭ do nàng gơtùi geh ală rơ was pah ngai lòt rê den ờ mìng is cau tờm rơ was mờ jơh bal bol hi kung kơp gơn là bol he pal sền gàr niam, lơh jat niam tơngume do. Kung kơp kờñ là bơh đah nac nhơl chờ den tus mờ Buôn Đôn sền rơ was gời, bañ hàu rơ was tai, hơ̆ sồng bol he gơtùi sền gàr rơ was gam wơl sơlơ jŏ sơlơ niam. Nùs nhơm bal bơh kơnhoàl dê kung bè làng bol dê den geh bơta ring bal bè hơ̆”.

Gùng dà do bơh gah lơh broă geh gơnoar mờ gơnoar atbồ kơnhoàl dê geh nac nhơl chờ kờñ ngan. Ồng Nguyễn Xuân Thủy, dùl nă nac nhơl chờ bơh càr Vĩnh Phúc uă dơ̆ tus Buôn Đôn lòt sền đơs là, rùp hin rơ was dê neh gơ jat bal mờ ù tiah Buôn Đôn bơh uă nam do mờ geh nac nhơl chờ tàm lơgar mờ bơdìh lơgar git tus. Bulah bè hơ̆, jat ồng Thủy đơs, hàu rơ was lòt gùt dar tiah nhơl chờ mờ tiă dà dờng Srêpôk neh ờ gam gơ kờñ tai, broă tam gơl ală bơta broă lơh nhơl chờ tàm do là dipal ngan: “Bol he pal sang tĕ broă lơh nhơl chờ hàu rơ was tài ngòt rơngơt ngan. Geh boeh 3 tus 4 nă cau đì hơ đang rơ was hơ̆ sồng lòt gùt dar dùl tŭ tơngai lơyah den kung gŏ ờ geh bơta lơi niam. Hìu bơnhă añ neh geh tŭ lòt Thái Lan nhơl chờ. Tàm do, khi lơh nhơl chờ bè rơ was mờng chài ngan. Cau Thái Lan krơ̆ rơ was tàm dùl tiah geh pơng gàr ơm yah, ai rơ was in coh plai, tàm pơrlòng ntoat marathon, lơh xiếc… niam ngan. Kòn añ dê ơm rềp pơng gàr, rềp mờ rơ was hơ̆ sồng pà prìt rơ was in sa, ờ geh bơta lơi ngòt rơngơt”.

Bi Hà Nhi Phương Thảo, nac nhơl chờ tus bơh ƀòn dờng Hồ Chí Minh tus Buôn Đôn nhơl chờ đơs, tŭ do, mpồl rơ was tàm Dăk Lăk gam gơmù mhar ngan tài ờ hềt gơtùi deh kòn. Broă ngui bơta nhơl chờ hàu rơ was geh lơh mpồl rơ was gơmù mhar rlau, geh tŭ lơh gơbàn tus bơta ờ gam tai rơ was. Gah nhơl chờ kơnhoàl neh tam gơl ală tour nhơl chờ gơ rềng tus rơ was ngan là geh niam, gơ hòi gơ jà rlau: “Jat añ sơnơng den pal lơh ală broă lơh tour nhơl chờ gơ rềng tus rơ was ờ gŏ di bơyai lơh tour hàu rơ was. Pơn yơu lơh ală tour jòi git tềl jơng rơ was tàm Buôn Đôn, bơyai lơh ală tour tus bal ală broă lơh cùp hin, um mờ ròng rơ was, ai mìng gàr broă hàu rơ was den geh lơh gơ rềng tus pràn kơldang să jan rơ was dê, hơ̆ sồng rơ was digơlan chơt jơh, ờ gam tai”.

Gam kah, pơgap mờ do 2 nam, dùl nă nac nhơl chờ tus bơh kơnhoàl Khoái Châu, càr Hưng Yên tus bal sền git tour nhơl chờ hàu rơ was tàm Tiah nhơl chờ Buôn Đông ờ bơtuah gơtìp rơ was tơ dùh tàm ù lơh gơbàn sồt să kơn jơ̆ pal mut kấp kứu tàm hìu sơnơm. Tơnơ̆ tŭ gơlik geh broă do, ala mat Kông ty nhơl chờ Biệt Điện neh geh jơnau yal ơm lơh tour nhơl chờ sền git hàu rơ was.

Pa do, Hội đồng Ñân zân càr Dăk Lăk neh ring bal Nghị quyết bè broă lơh dong kờl rơ was hìu deh kòn. Jat hơ̆, kes priă càr dê geh dong kờl 500 rbô đông dùl nă cau tờm rơ was me dùl ngai mờ 600 rbô đông tàm dùl nă cau tờm rơ was dam tàm dùl ngai, tàm tơngai 30 ngai yô rơ was do dờp bơ tờp sơntìl. Dilah rơ was me geh bun, cau tờm rơ was pơn jat tai geh dong kờl 300 rbô đông dùl ngai tàm 10 nhai sơn rờp rơ was geh byn, 600 rbô đông dùl ngai bơh nhai 11 geh bun tus nhai dơ̆ 6 tơnơ̆ tŭ rơ was deh kòn.