Jăt jơnau kờp bơh Ci kụk Sền gàr brê càr Dăk Lăk yal, bơh bồ nam 2020 tus tŭ do, tàm bơnah brê bơh Kông ty lâm nghiệp Buôn Ja Wầm gơlik geh rơlao 500 dơ̆ mus kơl chi brê, mờ bă ù brê gơtìp sơgràm tus 360 lồ.

Ồng Nguyễn Quốc Hưng, Kwang atbồ Mpồl sền gàr brê càr Dăk Lăk đơs nền, Kông ty Lâm nghiệp Buôn Ja Wần ờ tơl mpồl cau lơh broă tàm broă sền gàr brê. Bơta gơtìp hoàc huơr là brê gơtìp mus kơl tàm tơngai jŏ, bă brê tàm bơnah brê geh jào kơnòl sền gàr bơh kông ty dê gơmù mhar. Tàm khà 8 rơbô 800 lồ brê geh kông ty do atbồ, tŭ do mìng gam di pơgăp 3 rơbô lồ geh brê mờ jơh ală bă brê ndrờm gơtìp mus kơl. Đah sền gàr brê gam tơnguh mpồl lơh broă mờ đơng lam mpồl sền gàr brê kơnhoàl Cư̆ Mgar pơgồp bal mờ gơnoar atbồ tàm tiah do, cau tờm brê nàng lơh ală broă lơh pràn kơl dang, kơrian broă mus kơl brê tàm do.