Tàm drà anih tờm Buôn Ma Thuột – do là drà tac phan ờs mờng dờng ngan rlau jơh bơh càr Dăk Lăk dê neh tac tai uă bơta phan, di pal mờ broă blơi phan tàm tơngai lồi nam. Uă ngan rlau jơh là ală bơta phan àu mpha, khŏ zep, ƀañ kèu… Bi Đoàn Thị Phong, tac àu mpha tàm tiah B drà anih tờm Buôn Ma Thuột pà git: “Nam do añ rơcang phan tac sa tềp gơguh 20% pơndrờm mờ pah nam, añ kung ràng phan bơna nàng tac tơnơ̆ sa tềp Tây mờ tac sa tềp dà lơgar tơn. Kơp kờñ nam do khà cau blơi gơguh uă rlau, tac phan yòm rlau. Giă tac nam do den ờ huan gơguh kas ir, phan bơna den li la ngan. Nam do, phan lơh gơs bơh suơn sre đơs bal giă tac gơguh đau, den tàng bol hi kơp kờñ sa tềp làng bol lòt blơi phan uă rlau”.

Jat bi Lưu Thị Hồng Hạnh, cau tờm anih tac phan tàm tiah C, drà anih tờm Buôn Ma Thuột đơs, ală nam rềp ndo, nac blơi phan ờ lòt blơi phan sa tềp ur ar bè lài do tai, cau blơi kung sền gròi tàm bơta niam phan bơna dê uă rlau den tàng ală cau tac phan kung pal ai ală bơta phan geh anih lơh gơlik loh làng, gàr bơta niam nàng tac làng bol in: “Giă tac nam do kung kơ̆ sơl, gơmù dùl êt. Đơs bal là phan tac nam do li la ngan. Tàm tơngai añ ai phan nàng tac làng bol in lòt blơi phan sa tềp den añ neh rơ wah ală bơta phan geh lir tem loh làng, geh sră blơi top ƀang kì pơrhê, cih mat hơ pơrgon gàr kloh niam phan sa tàm gah phan ƀañ kèu, jơh ală phan ngui sa den tàng làng bol iang nùs tĕ”.

Drơng dơ̆ sa tềp Giáp Thìn nam do, ală mpồl lơh sa kă bro, mpồl tac phan dờng tàm càr Dăk Lăk kung neh rơcang lài phan, kĭ sră hơ pơrgon mờ ală mpồl tac phan geh bơngă pin dờn nàng gàr bơta niam. Ală siêu thị tàm Dăk Lăk neh lam lơh uă broă lơh tơrmù giă tac mờ uă broă lơh dong kờl giă bè: tơrmù giă tơn, tơrgùm điểm, pà sră blơi phan, pà bal mờ phan ndai, blơi 2 pà 1…

Jat ồng Bùi Văn Quân, kwang atbồ siêu thị Go Buôn Ma Thuột đơs, tus tŭ do, siêu thị neh lơh gơs broă rơcang phan sa tềp, mờ khà phan pal geh gơguh tus mờr 32 tơmàn đông: “Siêu thị rơcang lài ai broă rơndap lơh tac phan sa tềp lài 2 nhai. Nam do, bol hi rơcang lài phan gơguh 10% pơndrờm mờ nam lài, broă rơndap lơh bol hi dê nam do tơrmù ơlak ƀièrr tus 50% tài jơnau kờñ bơh drà kă bro mờ tài ală broă lơh bơh Cíñ phủ dê. Bol hi tơnguh tai anih lơh mrềt, lơh broă mờ ală mpồl tac phan nàng rơcang lài phan tac sa tềp”.

Jat ồng Nguyễn Văn Nghiêm, Phó Kwang atbồ Sở Kông thương càr Dăk Lăk pà git, jơnau kờñ blơi phan ngui sa tàm dơ̆ sa tềp bơhiàn yau dà lơgar Giáp Thìn 2024 tàm càr Dăk Lăk kờp dŭ lài gơguh mờr 15%. Gah Kông thương neh sồr ală mpồl tac bro tàm càr lam lơh broă rơndap lơh rơcang lài phan li la, gàr bơta niam, giă tac dipal mờ sồr ală mpồl lơh sa kă bro tac phan gàr kơ̆ giă, hơ pơrgon ờ lời gơlik geh bơta ờ tơl phan, gơguh giă priă. Bal mờ hơ̆, lam lơh ală broă lơh tơnguh jơnau kờñ blơi phan, lơh ală drà, ràng tơlik, drà phan Việt Nam rê tàm ƀòn lơgar. Ồng Nguyễn Văn Nghiêm pà git: “Tus tŭ do, geh 11 mpồl lơh sa kă bro tus bal broă lơh gàr kơ̆ giă ală bơta phan pal geh. Kờp jơh khà priă mờr 500 tơmàn đông, ờ hềt kờp cau kă bro, hìu bơnhă geh anih tac phan ngui sa tàm càr. Nam do, geh bơta ƀuơn rlau, hơ̆ là ală mpồl lơh sa kă bro rơcang phan ờ mìng li la mờ gam uă bơta phan, gàr kloh niam phan sa tai. Bal mờ hơ̆ bol hi kung lơh broă mờ mpồl lơh sa kă bro, ală tiah lơi ờ tơl phan uă den rơp jun phan tus nàng tac tŭ geh jơnau kờñ”.

Bơta rơcang lài wil tơl bơh ală cau tac phan, mpồl lơh sa kă bro mờ anih lơh broă geh gơnoar dê là tềl tơnggŏ niam ngan nàng tơnguh jơnau kờñ blơi phan ngui sa, lơh gơlik bơta niam ngan rlau jơh ai làng bol càr Dăk Lăk in wă rò sa tềp wil tơl, lơngap lơngai.