Jat khà kờp jơnau yal bơh Ủy ƀan Ñân zân càr Dăk Lăk dê, tơngai bơh nam 2016 tus nam 2020, Dăk Lăk gơ hòi gơ jà geh 329 rơndap broă lơh bơcri priă tàm ală gah mờ kờp jơh priă bơcri 57 rbô tơmàn đông. Kờp bal tàm tơngai do, pah nam càr geh 65 rơndap broă lơh geh lơh sră ai gơnoar, mờ kờp jơh priă bơcri pơgap rlau 11 rbô 400 tơmàn đông. Mơya bơh nam 2021 tus tŭ do, gùt càr mìng geh 48 rơndap broă lơh geh lơh sră lơh nền gùng dà bơcri priă, kờp jơh priă bơcri 28 rbô tơmàn đông, kờp bal pah nam mìng geh 16 rơndap broă lơh, kờp jơh priă bơcri rlau 9 rbô tơmàn đông. Jơnau bơh broă gơmù rơndap broă lơh mờ priă bơcri tàm càr dê tàm 3 nam do là tài kòp Kovid-19, broă lơh sa dunia mờ tàm lơgar geh uă tam gơl; uă mpồl lơh sa kă bro dờng gơtìp kal ke, tàm tŭ mpồl lơh sa kă bro dềt mờ di mơ den ờ gơtùi geh rơndap broă lơh dờng, den tàng priă jền bơcri ờ huan uă.