Nam 2023, khà hìu bơnhă rƀah tàm càr Dăk Nông gơmù 2,8%, tàm hơ̆, tơrmù rƀah gơwèt mờ hìu bơnhă jơi bơtiàn dồ ết nă cau tàm càr dê là 8,1%. Mờ cồng nha do, càr Dăk Nông pơn jat tai lam lài tàm tiah Tây Nguyên bè tơrmù rƀah tŭ càr ơm tàm khà dơ̆ 2 là càr Dăk Lăk geh khà hìu bơnhă rƀah là 1,5%.

Ồng Hồ Sỹ Hải, kwang atbồ Cơldŭ lơh broă sền gàr dong kờl mpồl bơtiàn, Sở Lao động Thương ƀiñ mờ Xã hội càr Dăk Nông pà gĭt, bơh tŭ tơlik mat càr (2004) tus tŭ do, càr sùm sền gĭt tơrmù rƀah là kơnòl broă tờm. Ală nùs nhơm jơh nùs lơh ngan, pơnđơl pràn lơh ngan mờ dùl ròt broă lơh bơh càr dê neh cèng wơl cồng nha chờ hờp ngan tŭ tơrgùm kờp  tàm 20 nam do, càr Dăk Nông là dùl tàm 10 càr geh khà tơrmù rƀah mhar ngan rlau jơh gùt lơgar mờ lam lài tàm tiah Tây Nguyên. Khà hìu bơnhă rƀah bơh càr dê neh gơmù bơh 33,7% tàm lồi nam 2004 tus tŭ do mìng gam 5,2%. Càr ai jơnau kờñ nam 2024 gơmù 3% hìu bơnhă rƀah bal mờ pơnđơl pràn lơh ngan tus nam 2025 sền bal ờ gam geh hìu bơnhă rƀah jat jơnau kờñ pa. Nàng lơh geh ală jơnau kờñ do, bal ờ ngui ală broă lơh dong kờl bơh Dà lơgar dê, càr Dăk Nông gam tơrgùm lơh jat uă broă lơh geh ngan mờ geh cồng nha.