Dơ̆ pơrlòng jơh bơsram kâp 3 nam do càr Dăk Nông geh 7 rbô 404 nă cau cih mat tus bal pơrlòng, tàm hơ̆ geh 1 rbô 771 nă cau pơrlòng là cau jơi bơtiàn dùl êt nă cau. Gùt càr lơh 19 anih pơrlòng mờ 327 cơldŭ pơrlòng. Ală anih pơrlòng geh bơyai lơh tus tơl kơnhoàl, ƀòn dờng gàr bơta ƀuơn ngan rlau jơh ai cau tus bal pơrlòng in, tơrmù lơyah ngan rlau jơh broă cau pơrlòng pal lòt ngài, gàr lơngăp lơngai tàm tŭ lòt rê ai cau pơrlòng mờ cau tờm in.

Ồng Phan Thanh Hải, Phó Kwang atbồ Sở Giáo zụk mờ Đào tạo càr Dăk Nông pà git, tus tŭ do, broă rơcang ai dơ̆ pơrlòng in neh wil tơl jơh ală bơta pal geh. Tàm tŭ tơngai tàm 2, 3 tiah geh broă gơlik geh kal ke bè lơngăp lơngai, broă lơh gàr niam lơngăp lơngai mờ rơcang sơndră blac pơrlồm bơh broă ngui măi mok kông nghệ kao tàm dơ̆ pơrlòng nam do geh càr Dăk Nông sền gròi uă ngan.