Geh 4 mpồl broă geh lùp, gơ wèt gah atbồ bơh ală Ƀộ: Lao động- Thương ƀiñ mờ Xã hội, Khoa họk mờ Kông nghệ, Giao thông- Vận tải mờ Ủy ban jơi bơtiàn kòn cau. Bal mờ ală Ƀộ trưởng, kwang atbồ gah broă lơh kong kơnòl hơ jơnau lùp tờm, 3 Phó Thủ tướng Cíñ phủ, tàm hơ̆ geh: ồng Lê Minh Khái, ồng Trần Lưu Quang, ồng Trần Hồng Hà, Ƀộ trưởng ală Ƀộ: Tài cíñ; Kế hoạc mờ Đầu tư; Nông nghiệp mờ Phát triển Nông thôn kung hơ jơnau lùp, mblàng lơh loh tai ală tơngume geh gơ rềng.

Củ tịc Quôk hội ồng Vương Đình Huệ đơs, dơ̆ lùp mờ hơ jơnau lùp geh lơh tàm nùs nhơm ring bal jơnau đơs, song dơpă, duh hồl, gơ hòi gơ jà geh bơta gròi sền uă ngan bơh cau tĕ khà mờ làng bol gùt lơgar dê. Ală Ƀộ trưởng bulah là cau neh geh uă mờng chài halà pa tus bal tàm broă hơ jơnau lùp dơ̆ sơn rờp ndrờm neh ai tơnggŏ nùs tồr, git loh bơta ngan ngồn gah broă lơh să tờm dê mờ gah broă lơh să tờm drơng lơh, song dơpă, ờ kwi kuơ, pleh, kờp bal mờ ală broă kal ke.