Do là dơ̆ pơrjum lồi nam nàng sền swì, đơs broă lơh jăt kơrnoăt bơh Hội đồng Ñân zân càr dê bè kơnòl broă bơtàu tơnguh lơh sa- mpồl bơtiàn nam 2023, ai tơlik kơnòl broă mờ broă lơh jăt nam 2024 mờ ai jơnau đơs uă broă lơh, rơndăp broă lơh kwơmàng bơh càr dê. Digơlan dơ̆ pơrjum geh lơh tàm 03 ngai.

Tàm dơ̆ pơrjum do, Hội đồng Ñân zân càr Dăk Lăk kung rơ̆p sền swì ală jơnau yal bè broă lơh rơcăng sơndră cau lơh tìs mờ lơh tìs adat boh lam tàm ù tiah càr dê, broă lơh rơcăng sơndră sa kwề sa kwà, bơsong jơnau lùp, jơnau yă, iăt Ủy ƀan Mặt trận dà lơgar Việt Nam càr yal bè broă lơh tus bal bơ̆t bơtàu gơnoar ătbồ, sền swì cồng nha hơ, bơsong jơnau lùp bơh cau tĕ khà dê mờ bơyai lơh dơ̆ cribơyai. Đơs mŭt pơrjum do, mò Huỳnh Thị Chiến Hoà, Củ tịc Hội đồng Ñân zân càr Dăk Lăk, pà gĭt: ală jơnau đơs mờ jơnau lơh nền tàm dơ̆ pơrjum rơ̆p lơh geh cơng tàng adat boh lam, bơta gơn kơnờm ai bơtàu tơnguh lơh sa- mpồl bơtiàn, sền gàr niam dà lơgar- lơngăp lơngai, bơ̆t bơtàu ală anih lơh broă cíñ trị tàm ƀòn lơgar càr dê tàm nam 2024 mờ ală nam pơn jăt tai.