Đơs tàm dơ̆ lơh broă, ồng Võ Văn Thưởng, Kwang bàng lơh broă tàm Ƀộ Cíñ trị, Duh broă sùm Ƀan Ƀí thư Đảng Dà lơgar đơs là, gơlik geh bơh càr Kon Tum dê ờ bơtàu tơnguh ngan mơya bal mờ bơta lơh ngan bơh Đảng mờ Làng bol dê neh lơh geh ală cồng nha kwơmàng ngan; Broă lơh bơ̆t bơtàu lơh niam wơl Đảng lơh geh uă cồng nha pơnrơ ngan; Geh bơta gơguh jak tàm rơndăp tăp sèng mpồl kwang bàng lơh broă dà lơgar, sền kwơ jơh ală broă tàm broă lơh kwang bàng...Bè kơnòl broă càr Kon Tum dê tàm tơngai tus, Duh broă sùm Ƀan Ƀí thư Đảng Dà lơgar ồng Võ Văn Thưởng đơs sùm: Kơnòl broă kwơmàng khà dùl là drơng gàr kơlôi rơcăng ai làng bol in. Lơh bè lơi lơh geh cồng nha uă rlau tàm tơrmù rƀah kơ̆ kơl jăp, tàm bơtàu tơnguh rài kis làng bol dê. Broă dơ̆ bàr sền gàr kơ̆ kơl jăp sền gàr dà lơgar lơngăp lơngai, lơngăp lơngai tàm tiah làng bol kòn cau. Dơ̆ pe là pal gàr brê, gàr phan kwơ geh is, gàr phan kwơ tàm ù pal bơtàu tơnguh niam, kơ̆ kơl jăp.