Bàr gah ring bal uă gơwèt mờ ală cồng nha neh lơh geh, tàm hơ̆ đơs nền: Bơta pơgồp bal đah Gah đơng lam Mpồl ling sền gàr tiah nhàr lơgar Việt Nam mờ Tổng Kụk Ntrờn ơm kis lơgar Campuchia dê neh pơgồp bơnah sền gàr lơngăp lơngai rơndăp tăp sèng, lơh geh tơl ală bơta ai broă lơh lòt rê gan tiah nhàr lơgar lòt gan ală mpồng nhàr lơgar, pơgồp bơnah bơtàu tơnguh lơh sa- mpồl bơtiàn, sơlơ tam klăc, lơh bơyô bal, gĭt wă bal mờ gơ̆p đah gơnoar ătbồ, làng bol mờ mpồl ling sền gàr tiah nhàr lơgar bơh 2 lơgar dê.

Tàm dơ̆ cribơyai, Trung tướng ồng Lê Đức Thái Kwang ătbồ Gah đơng lam Mpồl ling sền gàr tiah nhàr lơgar Việt Nam ki ngàm ưn ngài Tổng Kụk Ntrờn ơm kis lơgar Campuchia neh pơgồp bal, dong ală cau gơtìp aniai là cau Việt Nam gơtìp cau ờ niam pơndờm pơn jồ, lik lòt tus lơgar ndai tìs mờ adat boh lam mờ rồn bơklơn lơh broă tàm ală anih lơh sa kă bro tìs mờ adat boh lam tàm lơgar Campuchia. Tơngai tus, bàr gah pơn jăt tai pơgồp bal geh cồng nha tàm broă kơryan lik mŭt mờ lơgar ndai tìs mờ adat boh lam, di tŭ tàm yal tơngĭt bal jơnau, jòi kŭp kơryan ală mpồl cau tăc blơi cau, anih rồn bơklơn lơh broă, wèt tus bơsong jơh jơnau pa yal do.