Tàm 2 ngai 12 mờ 13 nhai 12, ală jơnau yal bè dơ̆ lòt còp kấp Dà lơgar Việt Nam bơh Tổng Ƀí thư, Củ tịc lơgar Lo Tập Cận Bình bềng tàm ală mắt ƀăo mờ gah mbàng yal tàm internet lơgar Lo dê. Rùp hin làng bol Việt Nam wă rò kwang đơng lam bồ lơgar Lo, dơ̆ wă rò ngan ngồn, dơ̆ cribơyai, dơ̆ jà hùc dà cè, ngan là jơnau Tổng Ƀí thư Nguyễn Phú Trọng pà mờ yal phan pà là dùl nơm pang rùp wăc sềr khảm trai bè rùp hin 2 nă cau hùc dà cè tàm Bắc Kinh tàm dơ̆ lòt còp lồi nam 2022 ai Tổng Ƀí thư, Củ tịc lơgar Lo Tập Cận Bình in neh geh tơrgùm pơn đàng mờ làng bol ngui internet tam pà wơl uă ngan.

Jơnau yal tàm gah Tân Hoa xã mờ Nhân Dân nhật ƀăo, Tổng Ƀí thư lơgar Lo Tập Cận Bình đơs nền tai “Bơta tam klăc niam bơnĕ ngan đah lơgar Việt Nam mờ Lo, là kwang bàng mơkung là oh mi” là rùp hin niam ngan rlau jơh bè bơta gĭt gơ̆p đah lơgar Việt Nam mờ Lo. Lơgar Lo sùm sền dờp bơta gĭt gơ̆p đah lơgar Việt Nam mờ Lo bơh gơnoar broă lơh broă bal kwơ màng mờ bơh bơta jŏ jòng. Ồng pin dờn là, mờ ală bơta pơn đơl pràn lơh ngan bal bơh jơh bal 2 gah dê, bơta gĭt gơ̆p 2 lơgar rơ̆p mut tàm tơngai pa mờ bơta pin dờn cíñ trị uă rlau tai, lơh broă bal lơngăp lơngai geh ngan ngồn rlau tai. Broă lơh bơt bơtàu củ nghĩa xã hội bơh 2 lơgar dê pơn jat tai lơh geh ală cồng nha pa mờ geh tă pơgồp pa tàm bơta kơ̆ kơl jăp, bơtàu tơnguh mờ bơtàu tơnguh rlau tai bơh tàm tiah do mờ tàm dunia.