Tơngleh Niam chài- Lòt nhơl càr Gia Lai nam 2023 geh bơyai lơh bơh ngai 11 tus ngai 18 nhai 11 mờ bơta tus bal bơh pơgap 1 rơbô nă cau chài tàm càr mờ bơdìh càr. Tàm hơ̆, bơta tờm là Festival Ù tiah Niam chài Cing mồng Gia Lai nam 2023 tơrgùm mpồl cau chài bơh 17 kơnhoàl, thị xã, ƀòn dờng tàm jơh gùt càr mờ ală càr tàm tiah Tây Nguyên. Pơn jat tai là ală dơ̆ lơh chờ niam ngan bè dơ̆ lơh chờ bơkào blàng- bơnơm ồs Chư Đang Ya, kơnhoàl Chư Păh; dơ̆ tàm pơrlòng plung dơm chi tàm dà dờng Pô Cô, kơnhoàl Ia Grai. Di dơ̆ do, tàm ƀòn dờng kung geh bơyai ală dơ̆ lơh chờ gùng drà; ràng tơlik wơl rài kis niam chài mpồl bơtiàn, bơhiàn niam chài bơh yau; ràng tơlik đờng goòng kòn cau Tây Nguyên.

Tàm pơn jat Tơngleh Niam chài- Lòt nhơl càr Gia Lai, tàm ƀòn dờng  Pleiku geh bơyai lơh Ngai chờ Lòt nhơl nam 2023 mờ Dơ̆ tàm pơrlòng ntoăt Gia Lai City Trail- Bơta kơ̆p kờñ dờng ơnàng. Năc lòt nhơl mờ làng bol geh sền ală dơ̆ ràng tơlik dròng cing jañ mồng chờ hờp hô hơng tềng đăp mpồng mut tiah ù tiah niam Biển Hồ. Tềng hơđơm mƀur tờm nho lơngơm mrềt, là dơ̆ ràng tơlik Pleiku Lài do mờ Tŭ do, mờ 100 rùp hin bè ală tơngume kòn bơnus, ù tiah niam, tiah drà, niam chài, dơ̆ lơh chờ tàm Pleiku bơh nam 1975 tus tŭ do. Ăt bồ Mpồl Cau pơgru mờ Kơnòm bơsram, cau tờm cùp rùp Ngô Văn Hòa pà gĭt:“Sră nggal rùp hin yau añ geh ơn prap bơh nam 2008 tus tŭ do. Rùp do ờ geh bản quyền, ală pang tàm internet ndrờm pơn đàng lơm. Añ lơh tàm ndrờm bal, rùp pa drờm mờ rùp yau, nàng cau in tàm pơndrờm bal. Bàr pe nă cau đơs ù tiah lài do niam, geh cau đơs là Pleiku tŭ do pa ngan. Añ kơ̆ñ làng bol Pleiku sền wơl ù tiah lài do dê; cau kơnòm să gŏ geh ƀòn dờng Pleiku bơtàu tơnguh bè tŭ do là geh dà kơl hề tă pơgồp bơh uă rơnàng ồng, bèp mờ làng bơi ală jơi bơtiàn tàm càr dê”.

Dùl bơta tờm bơh Ngai chờ Lòt nhơl nam 2023 dơ̆ do là dơ̆ tàm pơrlòng ntoăt “Gia Lai City Trail- Bơta kơ̆p kờñ dờng ơnàng” mờ bơta tus bal bơh 4 rơbô nă cau tus bal. Gùng ntoăt bơh ală bơta ngài 5 kơi sồ, 10 kơi sồ, nggùl marathon (21 kơi sồ) mờ full Marathon (42 kơi sồ) ndrờm geh mòn lơh geh bơh ù tiah niam ngan Biển Hồ dê, lòt gan ală suơn cè mờ gùng nho tơlir gĭt nđờ rơhiang nam, lòt gan mpồng mut Hìu Yàng Phờk Bửu Minh, tus bơnơm ồs Chư Đăng Ya rơmĭt jơh bơkào blàng tàm kơnhoàl Chư Păh. Gùng ntoăt là bơta tàm bơr lŭ bal bơh gùng drà, gùng dềt, gùng kơh, di tàm tơngai niam ngan rlau jơh bơh tiah kơh bơnơm Gia Lai dê. Mò Nguyễn Thị Hậu Hiền, neh 70 sơnam, bal mờ hìu bơnhă bơh Hà Nội mut tàm ƀòn dờng Pleiku lòt nhơl mờ tus bal dơ̆ tàm pơrlòng ntoăt, chờ hờp đơs: “Bơnơm ồs mờ bơkào blàng, ù tiah niam ngan rau; geh tờm nho bè do tai den nhơm trồ tiah sàng goh ngan. Kòn bơnus Pleiku den rềp mềl ngan. Mat sơnđan dơ̆ tàm pơrlòng ntoăt là Bơta kơ̆p kờñ dờng ơnàng, do ngan là bơta kơ̆p kờñ bơh añ dê bơh uă nam do. Tŭ do den geh tus bal dơ̆ tàm pơrlòng ntoăt tàm do mờ ù tiah niam bơnĕ ngan bal mờ hìu bơnhă añ, añ chờ ngan”.

Jat Mpồl bơyai lơh đơs, là dơ̆ ntoăt Trail- ntoăt jơng tàm pơgồp bal mờ guh bơnơm tàm ù tiah krơi is dơ̆ sơnđờm geh bơyai lơh tàm càr Gia Lai, khà pơrlòng nam do neh lơh geh dùl bơta gơ hòi gơ jà dờng ngan mờ mpồl bơtiàn ntoăt jơng gùt lơgar dê. Tàm khà ală cau tus bal tàm pơrlòng ntoăt jơng tàm dơ̆ ntoăt do geh uă ngan cau ntoăt jơng neh geh cồng nha uă ngan tàm ală dơ̆ tàm pơrlòng ntoăt jơng gùt lơgar dê kung bè tàm dơ̆ tàm pơrlòng tàm dunia tai. Dơ̆ tàm pơrlòng neh dờp geh bơta sền gròi, kờñ bơh 35 mpồl lơh broă, mpồl lơh sa kă bro mờ rlau 1 tơmàn priă măt mờ uă phan bơna ndai. Bơdìh mờ broă ngui tàm broă bơyai lơh, dùl bơnah priă jền rơ̆p geh ngui ai broă lơh gàr niam rài kis mpồl bơtiàn tàm ƀòn dờng Pleiku in mờ tă pơgồp ai Kes priă “Ào ram ai oh in”.

Kwang atbồ Cơldŭ lơh broă Niam chài, Yal tơngĭt jơnau ƀòn dờng Pleiku, càr Gia Lai Nguyễn Xuân Hà pà gĭt: mờ dùl ròt broă lơh niam chài, tàp pràn să jan, đơs crih tam ya niam ngan, Ngai chờ Lòt nhơl nam 2023 bơh ƀòn dờng Pleiku dê neh cèng wơl ală bơta sền gĭt gơ kờñ ngan gơwèt mờ làng bol mờ năc lòt nhơl in. Do kung là dơ̆ nàng càr in yal tơngĭt rùp hin kòn bơnus rềp mềl, ù tiah brê bơnơm mờ bơta niam chài bơh Pleiku dê. Kwang atbồ Cơldŭ lơh broă Niam chài, Yal tơngĭt jơnau ƀòn dờng Pleiku, càr Gia Lai Nguyễn Xuân Hà đơs:“Ală ngai do, ală anih lơh broă, mpồl lơh broă, ală xã, sơnah ƀòn, ală cau chài neh jơh nùs ngan pơlam tàp, kơ̆p kờñ tă pơgồp ai năc lòt nhơl mờ ală cau tus bal tàm pơrlòng tàm ală tiah in gŏ geh bơta niam bơnĕ niam ngan mờ bơta kờñ gơboh năc bơh làng bol Pleiku dê. Bơh do, ƀòn dờng kơ̆p kờñ pơyoa jơnau ƀòn dờng Pleiku rềp mềl kờñ gơboh năc mờ là tiah kơh bơnơm tơlir tài pràn kơl dang să jan dê”.

Ngai chờ Lòt nhơl ƀòn dờng Pleiku nam 2023 geh bơyai lơh bơh ngai 17 tus ngai 19 nhai 11 tàm Tiah lòt nhơl Ù tiah niam Biển Hồ, xã Biển Hồ, ƀòn dờng Pleiku. Tus mờ Ngai chờ, năc lòt nhơl tus bơh ală tiah geh bơnĕ bơnài bal mờ nùs nhơm niam chài krơi is ngan bơh jơi bơtiàn tàm tiah do dê bơh ală dơ̆ ràng tơlik dròng cing jañ mồng, bơyai lơh wơl bàr pe bơhiàn niam chài bơh yau bơh làng bol ală jơi bơtiàn dồ ết nă cau, ràng tơlik rùp hin Pleiku Lài do mờ Tŭ do, rùp lòt nhơl Pleiku... Bơdìh hơ̆, tus bal Ngai chờ, năc gam geh sa phan sa bơkah mùl gŏ ngan bơh càr Gia Lai dê, ală phan bơna OCOP. Mờ ală broă lơh niam chài- lòt nhơl sùm geh bơyai lơh tàm nhai 11 nam 2023, neh tơngŏ geh bơhiàn niam chài niam bơnĕ ngan, li la ngan, krơi is ngan bơh làng bol ală jơi bơtiàn dê. Mơkung yal tơngĭt bơta ƀuơn, bơta pràn lòt  nhơl gơ kờñ ngan bơh càr Gia Lai dê.