Tàm nam 2023, Gia Lai neh bơyai lơh ală dơ̆ lam lơh mờ ai is mhàm bè “Dơ̆ lơh chờ nam pa dum phồng”, “Ngai jơh gùt làng bol ai is mhàm 07/4”, broă lơh “Ală ntờc mhàm dum phồng kàl rlô bơkang”, broă lơh “Gùng lòt pơrhê”… neh gơ hòi gơ jà git nđờ rbô dơ̆ cau tus bal lơh jat. Gùt càr Gia Lai neh bơyai lơh geh 90 dơ̆ ai is mhàm, gơ hòi gơ jà rlau 25 rbô nă cau cih mat dan ai is mhàm, ai geh rlau 18 rbô 700 kơldung mhàm, geh 117% broă geh jàu. Tàm nam 2024, Mpồl đơng lam hòi jà ai is mhàm càr tơlik broă jàu hòi jà ai is mhàm geh 17 rbô kơldung mhàm. Mờ kung pơn jat tai lơh ală mpồl ai is mhàm, mpồl ai is mhàm rơcang lài mờ mpồl mblàng yal hòi jà ai is mhàm tàm ală kơnhoàl, hìu bơsram, kông ty.