Lòt gan rlau 42 nam crơng gơs, bơtàu tơnguh, tus tŭ do thôn geh 210 hìu bơnhă mờ 950 nă cau, geh 27 nă đảng viên. Tàm hơ̆, khà hìu bơnhă rƀah gam mờr 6%, tàm thôn geh 3 jơi bơtiàn ơm kis bal là Tày, Bahnar mờ Jarai. Làng bol tàm thôn uă ngan kis mờ broă lơh sa suơn sre, tam kòi 2 kàl geh 146 lồ, tờm bùm blàng 180 lồ, tam tơngời, khoah rbài ală bơta 6 lồ, priă lơh geh kờp bal dùl nă cau geh mờr 41 tơlak đông dùl nă cau dùl nam. Ală nam do, ală mpồl lơh broă cíñ trị mpồl bơtiàn mờ làng bol thôn Plei Kte dờng A neh jơh nùs lơh jat ală dơ̆ lam sồr, srơh tàm pơrlòng kờñ gơboh dà lơgar tàm thôn, tàm hơ̆ tờm ngan là dơ̆ lam sồr “Jơh gùt làng bol tam klac bal bơt bơtàu ƀòn lơgar pa, tiah drà gơguh jak”, “Lơh tam gơl mờng kwèng kơlôi sơnơng, broă lơh tàm làng bol jơi bơtiàn dồ êt nă cau nàng rơhời brồ guh lik klàs rƀah”.