Di pơgăp 1 nhai do, tŭ trồ mang, săp ntas ơhò pơn diang bràs bal mờ măi ƀồm geh kơno tàm tiah tơnao dà hìu măi lơh đèng dà Ia Ly. Uă măi chŏ, rơndeh pơn diang lik mờ mŭt nàng pơn diang bràs lơh broă sùm ờ ơm gơlơh bè dùl tiah lơh broă mờ măi mŏk dờng. bơh uă ngai sền, bol añ gŏ pah mang geh rơlao 10 nơm ơhò dờng, dềt tàm ala bal pơn diang bràs lik mờ mŭt tàm ală ƀlàng tơrgùm bràs. Geh ờ uă ơhò jồp bràs ƀồm tơn tus tàm rơndeh pơn diang mờ pơn diang tơn tus tàm tiah ndai nàng tăc. Dùl nă làng bol kis rềp tềng tơnao dà hìu măi lơh đèng dà Ia Ly (dan ờ yal măt) pà git: “Tiah lơh do neh geh bơh jŏ bloh, tŭ do (trồ mang) hơ̆ sồng lòt jồp bràs, trồ ngai den ờ jồp, trồ ngai ơhò ơm hờ rềp tềng gah tơnao dà hờ đah ne. Jồp bràs jơh là rê hờ đah do ƀồm tơn tus tàm rơndeh, ờ geh ƀlàng ơn lơi, tàm 1 ơhò là 1 rơndeh ndrờm bal lơm, ngai lơi kung bè hơ̆ lơm”.

Ồng Lê Xuân Dũng, Kwang atbồ cơl dŭ lơh broă Tài nguyên mờ Môi trường kơnhoàl Chư Păh pà git, tŭ do tàm kơnhoàl geh 10 tiah, mờ 10 mpồl lơh sa kă bro, kông ty geh ai sră lơh phan geh is, tàm hơ̆ geh 4 tiah geh ai sră lơh bràs, tàm ală xã Hà Tây, Ia Khươl, Ia Nhin mờ Ia Ka. Bơh bồ nam 2023, Ủy ƀan Ñân zân (UɃÑZ) kơnhoàl Chư Păh neh lơh geh dùl mpồl kwang bàng lơh broă nàng lòt sền, bơsong jơnau tơngit, jơnau yal bè broă lơh phan geh is ờ di mờ adăt boh lam. Mơya tàm ală tŭ geh tus sền ndrờm ờ gŏ bơta lơi. “Lơh phan geh is tàm tiah tơnao dà hìu măi lơh đèng dà Ia Ly tus tŭ do ờ geh dùl mpồl lơh broă lơi tơl bơta nàng lơh jăt mờ kơrnoăt tàm adăt boh lam dê. Kwang đơng lam UɃÑZ kơnhoàl, Kwang àng, Tài nguyên mờ Môi trường neh lòt sền tàm tơnao dà, mơya tàm ală tŭ tus sền kung ờ hềt gŏ. Tiah tơnao dà do ơnàng rềp bal đah bàr Gia Lai mờ càr Kon Tum mờ tŭ gŏ den ală cau ndrờm neh git lài, rơcang lài jơh ală bơta gơlik geh, kờñ kŭp geh den kal ke ngan, ală cau do mờng lơh tàm ală tŭ bơdìh mờ tŭ lơh broă, tàm trồ mang, jrô bơnang”.

Jăt jơnau yal bơh UɃÑZ kơnhoàl Chư Păh dê, tŭ do tàm tiah tơnao dà hìu măi lơh đèng dà Ia Ly geh 4 nă cau di mờ adăt boh lam gam lơh ală broă lơh gơrềng tus mờ broă lơh bràs. Bơdìh mờ ƀlàng tơrgùm di mờ adăt boh lam den gam 3 ƀlàng tơrgùm bơh ală mpồl lơh broă ndai tàm gơnoar broă là toah wàs tơnao dà. Bŭ lah ờ hềt geh blơi tăc, pơn diang phan geh is bè broă lơh, pơn diang neh gơlik geh tàm dùl tơngai jŏ. Ồng Nay Kiên, Củ tịc UɃÑZ kơnhoàl Chư Păh pà git, broă tơrgùm, pơn diang bràs ờ di mờ adăt boh lam mờng gơlik geh tàm trồ mang den tàng lơh gơtìp uă kal ke tus mờ mpồl lơh broă geh gơnoar. “Broă gơlik geh den pơn găp mờ do rơlao 1 nhai, mờ ală sră geh ai lơh broă là sră toah wàs tơnao dà bơh Ƀộ Kông thương ai tàm broă lơh tơnao dà. Bè kơrnoăt den ală mpồl lơh broă do ờ hềt gơtùi pơn diang lik bơdìh. Mơya tàm trồ mang ha là ală tŭ mpồl lơh broă ờ sền gròi den ală cau do neh pơn diang. Tus do bol añ geh lơh mpồl tus sền 4 tiah lơh broă tàm tiah do. Bơnah broă lơi gơwèt kơnòl broă bơh kơnhoàl bol añ dê geh lơh glài nền nòn, bơnah broă lơh lơi bơh càr, ha là càr ndai den bol añ dan mờ càr geh jơnau đơs mờ càr Kon Tum nàng lơh glài di jăt mờ kơrnoăt geh ai”.

Geh uă ngan rơndeh pơn diang bràs ờ di mờ adăt boh lam neh cèng bràs lik bơdìh tơnao dà hìu măi lơh đèng dà Ia Ly mờ ờ geh bơta lơi. Broă lơh ờ nền nòn, ờ geh kơnòl tàm broă atbồ tàm do gam lơh hoàc huơr uă ngan phan geh is bơh kơnhoàl do dê mờ lơh gơtìp uă ngan tus bơta gơrềng bal ndai bè bơta lơngăp lơngai.

Git nđờ rơhiang khối bràs geh pơn diang lòt tăc pah ngai ờ mìng lơh hoàc huơr phan geh is, lơh gơrềng tus mờ priă tă tàm kes priă kơnhoàl dê. Ồng Đoàn Tiến Cường, Kwang atbồ Kông ty hìu măi lơh đèng dà Ia Ly gơwèt tập đoàn Điện lựk Việt Nam pà git, broă lơh bràs ờ di mờ adăt boh lam gơlik geh tàm tiah tơnao dà hìu măi lơh đèng dà tŭ do ờ hềt lơh aniai tus mờ bơta niam, lơngăp lơngai broă lơh bơtơ̆t dơng dà. Tàm tơngai do, kông ty sùm ai canô, ơhò, plung lòt sền nàng gàr niam tơnao bơtơ̆t dơng dà. Tàm bơta di pơgăp 300 thơ̆k ngài bơh jơng bơtơ̆t, cau lơh broă hìu măi lơh đèng sền gròi, ting bơtrơh tŭ geh ală ơhò lơh bràs tus. Gam gơdìh mờ bơta ngài do den tàm tiah tơnao dà geh broă atbồ, sền gròi bơh anih lơh broă geh gơnoar kơnhoàl Chư Păh, Sở Tài nguyên mờ Môi trường, Kảñ sát môi trường dê. Bŭ lah lơh bràs ờ di mờ adăt boh lam ờ hềt lơh gơtìp tus mờ bơta kơl jăp broă lơh tơnao bơtơ̆t dơng dà, mơya broă do pal geh bơsong nền nòn, nàng sền gàr phan geh is, ù tiah niam tàm tơnao dà mờ gàr niam tiah kis.