Tàm dơ̆ pơrjum tàm Hìu pơrjum, kwang bàng tă pơgồp jơnau đơs, bulah Ủy ƀan Ñân zân càr neh tơlik mat uă mpồl lòt sền, tă bơsong bơta kal ke, kòl yan, mơya 7 tàm 21 jơnau kờñ lơh sa- mpồl bơtiàn nam 2023 bơh càr Gia Lai dê ờ lơh geh mờ jơnau kờñ geh ai. Den tàng bè hơ̆, ală gah lơh broă pal geh broă lơh is, loh làng nàng lơh jat kơnòl broă.

Ồng Phạm Minh Trung- Kwang atbồ Sở Tài nguyên mờ Môi trường càr Gia Lai kung cribơyai, lơh loh jơnau gơbàn gơ lam tus ală bơta kal ke tàm broă gĭt ù tiah bơh Hợp ták xã dê, pơlam gùng dà atbồ broă tiah ơm kis gah ròng phan, cribơyai tă pơgồp bal lơh nền giă ù nàng lơh mhar bơcri priă Dà lơgar. Mơkung sồr ală tiah pơgồp bal lam lơh mhar ală sră nggal nàng pà ù ai làng bol in tàm broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau.