VOV4.K’ho- Tềng đap bơta tam gơl gơguh sùm bơh giă xăng zờu, giă apah pơndiang năc bơh uă mpồl lơh sa kă bro tàm Gia Lai gam geh tam gơl wơl nàng di pal mờ bơta geh bal dê.

Ồng Châu Văn Liên (ơm tàm mpồl 2, sơnah ƀòn Hội Phú, ƀòn dờng Pleiku) blơi dùl vé rơndeh bơh rơndeh Thuận Tiến dê lòt bơh Pleiku tus ƀòn dờng Hồ Chí Minh mờ giă 350 rơbô đong. Ồng Liên pà gĭt, pơndrờm mờ dơ̆ đì rơndeh bơh 4 nhai lài ồng lòt, giă vé rơndeh neh gơguh tai 50 rơbô đong. Giă vé gơguh bơnah lơi gơrềng tus gơnoar kwơ bơh năc dê, mơya tơl nă cau ndrờm gĭt bal sơl tài bơh giă ñiên liệu sùm gơguh jơnhoa lơh ală gah rơndeh pơdiang năc gơtìp uă ngan bơta kơn jơ̆ kơn jŭt. Ồng Châu Văn Liên đơs: Ngai lài añ lòt giă xăng mìng rlau 20 rơbô đong 1 lít lơm, tŭ do den giă xăng dà lơgar neh gơguh mờr 34 rơbô đong. Mpồl lơh sa kă bro khi kung kă bro sơl den khi kung pal geh priă cồng sơl. Tơngai pa do sơrlèt gan kòp dờng ală mpồl lơh sa kă bro pơndiang năc kung kal ke uă ngan, jat giă xăng mờ mpồl lơh sa kă bro tơnguh giă hơ̆ den añ là làng bol añ gŏ kung là di ngan sơl.

Kông ty pơndiang năc Thuận Tiến lĭp sră yal giă pa tơnơ̆ tŭ neh geh bơta tam gơl giă

Đơs bè broă tam gơl tơnguh giă vé, ồng Nguyễn Hồng Hải- Kwang atbồ Kông ty TNHH Vận tải Hồng Hải pà gĭt: tơnơ̆ dùl tơngai jòng pal ơm ờ lơh broă tàm bàr pe gơl gùng lòt tài bơh kòp Kovid-19, mpồl lơh sa kă bro kờñ ngan bè ờs wơl khà giă vé nàng gơ hòi gơ jà năc. Mơya, tơnơ̆ tŭ ală bơta kòp geh gròi sền den giă xăng gơguh uă wơl tai lơh priă tă tơl dơ̆ lòt tŭ do sồr pal tơnguh giă vé. Ồng Nguyễn Hồng Hải đơs: Bơh do lòt tus ƀòn dờng Hồ Chí Minh đì jơh 400 lít zờu, lài do giă bol añ dê là 300 rơbô đong 1 vé mờ tŭ do giă zờu gơguh tus 31 rơbô đong mờr uă rlau 2 dơ̆, vé mìng tơnguh tai 50 rơbô đong 1 vé lơm tài kal ke bal mpồl bơtìan dê. 400 lít zờu dùl dơ̆ lòt mờ rê jơh 12 tơlak đong, gam wơl gùng BOT, priă nhai bơh cau măy rơndeh, priă tă 2 gah tiah ơn rơndeh, tŭ do ală bơta bal bè hơ̆ den kung pal bal mờ gơ̆p nàng tam pà bal bơta kal ke do.

Kung gơ rềng tus broă tam gơl giă vé rơndeh sơl, mò Trần Thị Ánh, Phó Kwang atbồ Kông ty TNHH Mai Linh Gia Lai đơs: Tam gơl tơnguh giă vé rơndeh là ờ gơ tùi pleh gơwèt mờ ală mpồl lơh sa kă bro pơndiang năc tŭ giă xăng zờu gơguh uă. Mơya, mpồl lơh broă kung ai tơlik khà tam gơl tơnguh giă di pal, gàr niam bơta ring bal bơta kwơ bơh năc mờ mpồl lơh sa kă bro in. Mò Trần Thị Ánh đơs: Tềng đap broă tơnguh giă xăng zờu bè hơ̆ sồr mpồl lơh broă pal tam gơl giă pơndiang nàng di pal mờ bơta geh ngan dê. Mpồl kung tơnguh giă pa ngan rlau jơh là tàm ngai 20/6 pa do, gơguh kờp bal pơgap 16% pơndrờm mờ lài do. Bơta tơnơ̆ kòp kal ke uă ngan, tàm tŭ ală bơta xăng zờu gơguh jơnhoa bè do sồr mpồl lơh sa kă bro tơnguh giă, tơnguh giă mơya geh ală bơta kơlôi sơnơng bơh mpồl lơh sa kă bro dê, mơya kơñ gam lơh broă den pal gơguh jat khà.

Uă mpồl lơh sa kă bro pơndiang năc pal tơnguh giă vé tềng đap bơta kơn jơ̆ bè xăng zờu sùm gơguh jơnhoa

Bơh bồ nam tus tŭ do, giă xăng zờu tàm lơgar neh 12 dơ̆ gơguh, 3 dơ̆ gơmù mờ gam “gơguh jơnhoa ngan rlau jơh” bè giă bơh lài tus tŭ do dê. Nàng gàr niam broă lơh, 25 mpồl lơh sa kă bro pơn diang năc lòt tàm ală càr, mpồl lơh sa kă bro taxi tàm ù tiah càr Gia Lai dê kung neh dơ̆ lĕ bal tam gơl tơnguh giă vé, giă pờ mpồng. Khà tam gơl tơnguh giă vé bơh ală mpồl lơh sa kă bro pơndiang năc dơ̆ do kờp bal là 15%.

Jat Sở Giao thông-Vận tải càr Gia Lai, mpồl lơh broă neh dờp geh sră nggal yal tam gơl tơnguh giă vé bơh jơh ală mpồl lơh sa kă bro pơndiang năc tàm ù tiah càr dê. Tơnơ̆ tŭ dờp, Sở neh sồr ală mpồl lơh broă lơh jat broă lĭp sră yal giă pa mờ ai priă di giă vé neh yal, broă tam gơl tơnguh giă vé pal di pal mờ khà tơnguh giă ñiên liệu. Ồng Nguyễn Bá Minh, Phó Kwang atbồ cơldŭ lơh broă drơng broă Phòng Kế hoạc- Tài cíñ- Vận tải, Sở Giao Thông Vận tải càr Gia Lai pà gĭt: Tŭ dờp geh ală sră nggal yal bơh ală mpồl lơh broă kă bro dê den bol añ kung neh sồr ală mpồl lơh broă lơh jat broă lĭp sră yal giă pa, tăc vé di giă geh yal jat jơnau sồr. Mơkung sồr ală ƀlàng ơn rơndeh, mpồl lơh broă geh gơnoar sơlơ lòt sền, jat sền broă lơh jat jơnau neh yal mờ ai priă pơndiang bơh ală mpồl lơh broă dê gàr niam broă lơh jat di mờ jơnau sồr bơh adat boh lam dà lơgar dê.

Cau cih Hoàng Qui- Cau mblàng K’Hạnh