Tàm mờr 3 rơbô nă ơruh pơnu càr Dăk Lăk dê lòt ling dơ̆ do geh 2 rơbô 502 nă cau lơh jat kơnòl broă ling klàng mờ 466 nă cau tus bal drơng broă tàm mpồl Kwang àng làng bol. Tàm khà do, pơgap 15% ơruh pơnu bơsram jơh đại học, cao đẳng, trung học chuyên nghiệp; ngan là, geh 3 nă ùr ơruh.

Ai tàm càr Dăk Nông, nam do geh 852 nă làng bol lòt ling tàm mpồl ling klàng mờ 265 nă làng bol lơh jat kơnòl broă tus bal Kwang àng làng bol. Dơ̆ jàu mờ dờp ling tàm càr Dăk Nông geh bơyai lơh yŭ rơ yùm tàm jơh 8 kơnhoàl, ƀòn dờng càr dê, ngan ngồn là ngai chờ lòt ling. Càr kung neh lơh niam broă lơh dong kờl cau lòt ling, ngan là lùp còp, pơndờm pơnđiang ală làng bol iang bồ tơngoh, rcang lòt ling.

Tàm Gia Lai, dơ̆ jàu dờp ling nam do geh 2 rbô 250 nă ơruh pơnu lơh kơnòl ling klàng, 400 nă ơruh pơnu lòt lơh kơnòl kwang àng làng bol, 30% ơruh pơnu cih is sră dan lòt lơh kơnòl ling klàng. Jat mpồl duh broă rơ wah ling, ală tiah tàm Gia Lai neh geh broă rơndap lơh rơcang lài khà ling nàng jàu di mờ jàu tơl, gàr bơta ring niam.

Ai tàm càr Kon Tum, tàm drim ngai 08/02, jơh 10 kơnhoàl, ƀòn dờng càr Kon Tum dê neh dùl ròt bơyai lơh dơ̆ jàu dờp ling nam 2023. Tàm khà 754 nă làng bol bơh càr Kon Tum dê lòt gùng lơh kơnòl ling klàng geh 19 nă cau cih is sră dan lòt ling, 4 nă cau là cau ùr mờ 12 nă cau jơh bơsram đại họk, kao đẳng. Pràn kơldang să jan bơh ală cau ling pa khà 1 geh rlau 60%. Mờ bơta rơcang lài wil tơl bè tơl bơta, dơ̆ jàu dờp ling nam 2023 tàm ală kơnhoàl, ƀòn dờng bơh càr Kon Tum dê ndrờm geh lơh tàm nùs nhơm king crŭ, ram mhŭ, ngan ngồn là ngai chờ lòt ling bơh cau kơnòm să dê lòt gùng lơh kơnòl ling klàng sền gàr dà lơgar.