Bi Trần Thị Bình, ơm tàm xã tiah nhàr dà lơgar Ia Dom, kơnhoàl Đức Cơ, càr Gia Lai geh rơ wah mut lơh kông ñân kau su Mpồl 2 Kông ty 72, Ƀiñ đoàn 15 neh rlau 10 nam do. Bi pà git, mờ priă lơh geh kơ̆ kơljap sùm pah nhai rlau 7 tơlak đông, tơnơ̆ uă nam, hìu bơnhă bi neh blơi tai mìr, tơnguh lơh sa tơnơ̆ tŭ jơ lơh broă, bơh hơ̆ geh phan bơna, priă jền prap tềm pềr, oh kòn geh tơl priă jền nàng bơsram sră. Bè hơ̆ den tàng bi sùm git loh gơnoar broă bơh cau kông ñân dê tàm dùl mpồl lơh sa, sền gàr dà lơgar: “Là kông ñân bơh Mpồl tam phan tàm tiah nhàr dà lơgar dê, geh cau lơi krơi mut tàm suơn chi den bol hi rơp yal mơ mpồl lơh broă mờ mpồl grăp ƀòn in, nàng gàr niam broă rơndap lơh nàng bol hi in iang nùs lơh sa mờ sền gàr kơ̆ tiah nhàr dà lơgar”.

Ai tàm tiah nhàr dà lơgar Chư Prông, càr Gia Lai, kơnờm geh rơ wah mut lơh kông ñân bơh mpồl 5, Trung đoàn 710 mờ rài kis hìu bơnhă bi Kpuih Kớt neh tam gơl jơh tơn. Bi pà git, ùr bơklau bi dê pa lik ơm is, ù tam phan den ro kơnrañ, den tàng rài kis kal ke ngan. Bơh bồ nam 2022, jơh bal 2 nă ùr bơklau bi Kớt geh rơ wah mut lơh kông ñân kau su, rài kis hìu bơnhă ngai sơlơ wil tơl, kơ̆ kơljap: “Tŭ do den 2 nă ùr bơklau añ kung neh geh rài kis bơtàu tơnguh rlau. Bơh chờm, tŭ mut lơh kông ñân, mpồl lơh broă neh dong kờl 2 nă ùr bơklau añ in. Tŭ do, hìu bơnhă geh priă jền lơh geh sùm, kòp jê den geh mpồl lơh sơnơm ling klàng. Tơngai tus, 2 nă ùr bơklau añ rơp lơh ngan lơh niam rlau tai, bơsram mờng chài lơh broă bơh ală kông ñân lài, geh bơta chài lơh broă uă nàng tơnguh tai priă jền lơh geh”.

Ơm tàm ù tiah 3 xã tiah nhàr dà lơgar Ia Pnôn, Ia Nan, Ia Dom, dùl bơnah xã Ia Kla mờ thị trấn Chư Ty, kơnhoàl Đức Cơ, brê kau su bơh Kông ty TNHH MTV 72, Ƀiñ đoàn 15 gam pơgồp bal mờ 18 anih làng bol ơm kis, thôn, ƀòn càr Gia Lai dê. Đah ne tiah nhàr dà lơgar, Kông ty kung neh geh ală mpồl tam kau su tàm 7 xã gơ wèt 2 kơnhoàl Oyadav mờ Bo Keo, càr Ratanakiri, lơgar bơtau Campuchia. Bal mờ broă tam gơl pa, tơnguh cồng nha sơngka sền gàr chi tam, mpồl gam lam lơh uă broă lơh gàr lơngăp lơngai rài kis mpồl bơtiàn, kham kòp, pà sơnơm ờ sa priă, tàm pơgồp bal hìu bơnhă kông ñân cau Yoan mờ cau jơi bơtiàn dùl êt nă cau bal mờ gơp dong kờl bơtàu tơnguh lơh sa. Thiếu tá Phan Tiến Đoàn- Phó Kwang atbồ Kông ty 72, Ƀiñ đoàn 15 pà git: “Là mpồl lơh broă tàm 3 xã tiah nhàr dà lơgar, pah nhai, mpồl bol hi sồr cau tus bal pơgồp bal sền gàr lơngăp lơngai cíñ trị, lơngăp lơngai ƀòn lơgar tàm ù tiah mờ he lơh broă; lơh niam broă lơh atbồ phan bơna; mờ kung pơgồp bal mờ ală mpồl sền wơ wì bơta ơm kis ing, ờ geh mat ing tàm tiah ơm kis. Pah nhai, mpồl sền gàr is bơh Kông ty dê tus bal lòt sền gàr gùng nhàr dà lơgar, jrong nhàr dà lơgar. Ală nam do, kông ty geh kâp ủy, gơnoar atbồ tàm ƀòn lơgar jờng rơ ngan”.

Mờ jơnau đơs “Ƀiñ đoàn pơgồp bal mờ càr, kơnhoàl; Kông ty pơgồp bal mờ kơnhoàl, xã; mpồl lơh sa pơgồp bal mờ thôn, ƀòn; Hìu bơnhă kông ñân cau Yoan pơgồp bal mờ hìu bơnhă làng bol jơi bơtiàn dùl êt nă cau”, tŭ do Ƀiñ đoàn 15 gam lam lơh kơnòl broă lơh sa gơ jat bal mờ sền gàr dà lơgar jat kềng gùng nhàr dà lơgar jòng rlau 250 kơi sồ tàm tiah đah tô Tây Nguyên, rềp mờ lơgar Lào, Campuchia. Ală nam do, ală mpồl sùm sền gròi tus broă bơto broă lơh, tàm jàu bơta chài ròng phan, tam phan, dong kờl sơntìl, priă bơcri… dong làng bol bơtàu tơnguh lơh sa hìu bơnhă. Bơh hơ̆, uă hìu bơnhă kông ñân cau jơi bơtiàn dùl êt nă cau neh jơh rƀah, brồ guh lơh pas; pơgồp bơnah bal mờ gơnoar atbồ tàm ƀòn lơgar bơt bơtàu ƀòn lơgar pa tàm tiah nhàr dà lơgar.

Thiếu tướng Hoàng Văn Sỹ, Phó Ƀí thư Đảng ủy, Kwang đơng lam bồ Ƀiñ đoàn 15 pà git, Ƀiñ đoàn tŭ do geh rlau 15 rbô nă kông ñân, uă ngan là cau jơi bơtiàn dùl êt nă cau. Nam 2022, priă lơh geh kờp bal bơh cau lơh broă dê geh 8 tơlak đông dùl nhai. Rài kis bơh làng bol, cau lơh broă tàm tiah nhàr dà lơgar dê rơhời geh tơnguh, mpồl lơh sa- sền gàr dà lơgar ngai sơlơ kơ̆ kơljap: “Bơta tam klac bal đah ală jơi bơtiàn, tìp mat lơh kwèng niam chài pa tàm mpồl bơtiàn ngai sơlơ gơguh uă; nùs nhơm đềt mềr đah làng bol, kwang bàng, kông ñân bơh Ƀiñ đoàn dê sùm đềt mềr mờ kơ̆ kơljap. Kuơmàng ngan rlau jơh là làng bol git wă rlau tai tàm broă sền gàr tiah nhàr dà lơgar he dê, di tŭ git gŏ ală bơta nisơna, krơi sơ ƀơi, yal di tŭ bơh hơ̆ bol hi neh pơgồp bal mờ ƀòn lơgar mờ kâp hơ đang, di tŭ bơsong ală broă kal ke gơlik geh”.

Mờ ală gùng dà, jơnau lơh nền dipal, broă dong kờl di nùs làng bol, ală bă brê kau su neh pơgồp bơnah lơh gơs tiah nhàr dà lơgar tơlir, kơ̆ kơljap jat tiah nhàr dà lơgar đah tô Tây Nguyên dê.