Rlau jơ̆t nam do, mò Ka Joen ơm tàm xã Liêng Srôñ, kơnhoàl Dam Rong, càr Lâm Đồng sền gŏ uă ngan dơ̆ broă lơh niam wơl măt gùng gơl gùng rơndeh 27 lòt gan tềng đăp măt hìu he dê. Gùng pa lơh niam wơl bàr pe nhai den gơtìp tơrlah tai, geh uă tai tiah rơlŭ rơlùn dờng ngan. Bơta geh ngan do gơ geh sùm wih wơl uă dơ̆ ngan lơh broă lòt rê, ơm kis lơh broă sa bơh làng bol tàm tiah di gơtìp gơrềng uă ngan. Mò Ka Joen, đơs: Trồ mìu den bềng dà lơm là dà, gơ ngơr bam bè tơnau ne tơn, ờ gŏ bàn gùng lòt hơ̆. Ai trồ tơngai den thul kơmbuh ù lơm, wih ờ niam ngan ih.

Uă gơl gùng rơndeh 27 kung gơtìp tàm bơta bè do sơl. Măt gùng sùm geh lơh niam mơya kung mhar ngan gơtìp tơrlah jơh lơh broă lòt rê tìp uă ngan kal ke. Ồng Đoàn Văn Vĩnh, ơm tàm xã Dà Rsal, kơnhoàl Dam Rong, càr Lâm Đồng, đơs: Uă ngan là lơh nđăp gơtìp tơrlah bơh ngkời. Tŭ mìu rơndeh pơndiang phan lòt gan den dà gơprañ làm bă tiah, cau lòt rê ờ bơtuah măy rơndeh ờ gŏ gĭt là gơtìp gơdùh tơn tàm rbòng dà. Mang jơngo ơruh pơnu lòt rơndeh tơnbruh khăt gơboh gơlềng gơlàng, pleh rơndeh pơndiang phan, pleh gùng rơlŭ rơlùn gơlam tus rềs àr gơtìp uă ngan.

Gùng rơndeh 27 là gơl gùng lòt tờm ngan tàm tơrbŏ bal bàr càr Lâm Đồng mờ Dăk Lăk, mờ kờp jơh gùng jòng rlau 200 kơi sồ, geh bơcri priă lơh tơl tŭ tơngai mờ ai ngui bơh tàm nam 1998. Jăt ồng Nguyễn Văn Gia, Kwang ătbồ Sở Giao thông mờ Vận tải càr Lâm Đồng dê yal, priă ai sền gàr gơl gùng do bơh Ƀộ Giao thông mờ Vận tải dê pà, mờ priă tă lơh niam wơl ờs mờng jăt dơ̆ bơh 40 tus 50 tơmàn đong dùl nam mìng tơl nàng càr lơh niam wơl bơh 8 tus 10 kơi sồ gùng tàm dùl nam. Ngan broă lơh niam wơl mờ sền gàr gùng geh lơh bơchềt bơchòt lơh dềt rah rài den tàng gùng sùm gơtìp tơrlah mờ rơlŭ rơlùn uă ngan. Ồng Nguyễn Văn Gia, đơs: Bè priă tă ai bè hơ̆ den loh làng là ờ lơh geh jơnau kờñ, den tàng gơlam tus jơnau gơl gùng do neh lơh niam wơl den gơl gùng ndai neh gơtìp ờ niam tĕ. Càr kung neh dan bơh jŏ ngan rao, mờ tàm nam 2010 den Ƀộ Giao thông mờ Vận tải neh geh kơrnoăt kĭ ring bal gùng dà bơcri priă lơh gơl gùng do mờ priă tă lơh pơgăp 1 rbô 400 tơmàn đong. Bulah bè hơ̆, bơh hơ̆ tus tŭ do, càr sùm gh jơnau đơs bơh uă gah, Ƀộ Giao thông mờ Vận tải den geh hơ sơl uă dơ̆ là ờ hềt geh priă nàng bơcri lơh gơl gùng do.

Ủy ƀan Ñân zân càr Lâm Đồng neh jòi uă broă lơh, tàm hơ̆ geh jơnau dan lơh geh kơrnoăt nàng càr Lâm Đồng in tă is priă càn lài nàng lơh. Bulah bè hơ̆, ồng Phạm S, Phó Củ tịc Ủy ƀan Ñân zân càr Lâm Đồng den đơs, tài bơh broă do là ờ hềt geh bơh lài den tàng nàng lơh là kal ke ngan. Ồng Phạm S, đơs: Gơl gùng rơndeh 27 lòt gan ù tiah càr Lâm Đồng là ờ niam ngan rlau jơh tàm 128 gùng rơndeh dờng lơgar Việt Nam dê mờ 14 nam do ờ hềt geh ai priă lơh niam wơl. Pa do, Phó Thủ tướng Cíñ phủ ồng Trần Lưu Quang tus den Củ tịc Ủy ƀan Ñân zân càr Lâm Đồng kung neh pơn jăt tai dan, mờ jơnau dan do bol añ đơs là dipal ngan. Tàm bơta priă jền ờ tơl tam pà ală broă lơh bơ̆t bơtàu tờm kwơmàng dà lơgar pal geh bơta ring bal bơh Phó Thủ tướng Cíñ phủ hơ jàu ai Ƀộ Giao thông mờ Vận tải in. Ƀộ Giao thông mờ Vận tải rơ̆p geh sră ngal ờ ai geh priă mờ sồr càr Lâm Đồng lèng càn lài nàng lơh. Bulah bè hơ̆, do là broă ờ hềt geh bơh lài den tàng bè hơ̆ bulah neh dan mơya digơlan rơ̆p kal ke ngan.

Tŭ do, pah nam, kes priă dà lơgar tă uă tơmàn đong nàng lơh broă lơh sền gàr, lơh niam wơl gơl gùng rơndeh 27 gơl gùng lòt gan ù tiah càr Lâm Đồng dê mơya gùng kung gam ơm sơl tàm bơta ờ niam tai uă ngan. Bơta geh ngan do lơh gơbàn uă kal ke tàm broă lòt rê, gơrềng uă tus bơtàu tơnguh lơh sa- mpồl bơtiàn bơh càr Lâm Đồng mờ kơnhoàl ù tiah Tây Nguyên dê.