Tàm hơ̆ kơnòl broă sền gàr tiah nhàr lơgar mờ tờm ngan là ơm gak sền gàr gơnoar tờm ală tiah tàm dà lềng geh jàu lơh kơnòl broă, Hải đoàn 129 neh bal mờ mpồl Ling dà lềng tàm ală ƀồt bơlào, hìu dra sền gŏ mờ tam dră wơl, kơryan bơh gờñ, bơh ngài ală broă lơh bơh lơgar ndai dê sơgràm gơnoar tờm dà lềng, bồt bơlào bơh lơgar he dê. Ờ mìng lơh jat geh cồng nha kơnòl broă ling klàng- sền gàr dà lơgar, sơr lèt gan tơl bơta kal ke lơm, 45 nam do Hải đoàn 129 kơ̆ kơl jap lơh broă tàm dà lềng, lơh niam kơnòl broă lơh sa kă bro, gơ gơs bồng bi lam lài bơh Quân chủng Hải quân dê tàm broă lơh kơnòl broă sền gàr Dà lơgar mờ bơtàu tơnguh lơh sa wèt hờ tàm dà lềng.

Ală ngai lồi nhai 05, rƀàng anih ơhò ơm Hải đoàn 129 tàm ƀòn dờng Vũng Tàu hô hơng rlau tŭ kwang bàng, cau ling, cau lơh broă tàm mpồl ơhò ờ ru ngan rcang ai dơ̆ ơm gak tàm anih tờm, lòt sền, sền gàr gơnoar tờm dà lềng, bồt bơlào dê. Ală kwang bàng, cau ling rơnàng 9x mơya geh nùs nhơm kơ̆ dơn cíñ trị kơ̆ kơl jap tềng đap ală bơta kal ke bòl glar tàm dà lềng. Bulah dơ̆ lòt lơh broă tàm dà lềng jŏ ngai mờ ờ dùl ết bơta kal ke, uă bơta lòng mờ jơh bal ală bơta ngòt rơngơ̆t mơya jơh ală cau ling ndrờm dờp kơnòl broă mờ nùs nhơm jơh nùs uă ngan rlau jơh. Thượng uý ồng Hoàng Xuân Thành Lập, cau atbồ mpồl cau măi ơhò 732, pà gĭt: “Lơh kơnòl broă tàm ală bơta trồ tiah kal ke, nsừc dà lềng dờng, càl dờng mơya jơh ală cau ling geh griăt tàm ơhò sùm gĭt wă is, sền gĭt loh làng kơnòl broă nàng bơh hơ̆ lơh sir jak ngan kơnòl broă geh jàu”.

Trung úy Vũ Văn Trường, Kwang atbồ Ngành cơ điện ơhò 746, Hải đội 922, Hải đoàn 129 đơs: lơh kơnòl broă tơn tàm dà lềng ngài, trồ tiah càl rơbŭt dờng, nsừc dà lềng pràn, càl dờng gơbàn nisơna, geh tŭ gam pal kong mờ ală bơta ngòt rơngơ̆t, mơya pơn yờ să ngan là cau ling dà lềng dê, tơl nă kwang bàng, cau ling sùm tàm nùs nhơm rcang lài tam lơh, dờp phi să tài broă lơh sền gàr gơnoar tờm dà lềng, bồt bơlào dê. Trung úy Vũ Văn Trường, đơs: “Ơhò bol añ dê uă nam sùm pa lơh jat kơnòl broă ơm gak gơnoar tờm tàm tiah dà lềng tiah đah jum mờ pal tus bal ală broă drơng nhơm zờu. Bulah dơ̆ lơh broă sùm jŏ ngai tàm dà lềng, mơya tài bơh sền gĭt niam kơnòl broă mờ geh lơh niam broă lơh bồ tơngoh den kwang bàng, ling geh griăt ờs mờng tàm ơhò sùm iang nùs lơh broă, đềt mềr mờ kờñ tă pơgồp dà kơl hề jŏ jòng ai mpồl ling in. Añ pơn yờ să ngan mờ kung sền gŏ he bơtoah ngan tŭ geh tă pơgồp dà kơl hề ai broă lơh bơt bơtàu mờ sền gàr Dà lơgar tàm dà ào bơh cau Ling dà lềng dê”.

 Là mpồl ling lơh jat kơnòl broă ling klàng sền gàr dà lơgar, pơgồp bal lơh sa, tàm hơ̆ kơnòl broă sền gàr dà lơgar mờ tờm ngan là ơm gak sền gàr gơnoar tờm ală tiah dà lềng geh jàu kơnòl broă, Hải đoàn sùm lơh jat niam kơrnoat boh lam, broă lơh, mpồl ling, rơndeh rơndồ măy mok ơm gak rcang lài tam lơh tàm ală kấp, ờ gơtìp rơmơ̆p ndơl, nisơna tềng đap tơl ală bơta gơlik geh. Bơdìh hơ̆, kơnòl broă lơh sa kung geh Hải đoàn 129 lơh jat geh cồng nha bè bơyai lơh ală broă lơh drơng nhơm zờu; crăp năng lượng sàng goh tàm ală ƀồt bơlào, hìu dra; lơh niam wơl ơhò, plung mờ ală broă lơh tàm dà lềng. Ngan là tàm ală nam pa do, kwang bàng cau ling Hải đoàn gam lơh jat ală kơnòl broă lơh niam wơl,  lơh pa, lơh niam jơh bơnah pơrđồng bal mờ bơnah gơkrăm ală hìu dra DK1 tàm dà lềng dê. Do là dùl broă lơh bơtàu tơnguh ngan tàm broă sền gĭt kông nghệ mờ lam lơh bơh mpồl ling dê. Thượng tá Bùi Quang Tú, kwang atbồ Hải đoàn 129 đơs sùm: nàng lơh sir lơh geh cồng nha kơnòl broă lơh sa pơgồp bal mờ sền gàr dà lơgar, lơngap lơngai tàm tơngai pa, tàm sùm ală nam do, Hải đoàn sùm lơh jat niam bơta pràn tàm dơlam is, ngăc ngar, bơceh lơh cèng wơl cồng nha uă ngan.

Thượng tá Bùi Quang Tú, đơs: “Nàng lơh sir niam ngan kơnòl broă sền gàr dà lơgar- lơh sa, Hải đoàn neh lơh niam broă pơlam tàp ling klàng, bơto bơtê cíñ trị, atbồ pơlam tàp, duh rơngòt kơrnoat boh lam, bơt bơtàu rài kis cíñ quy, gàr niam lơngap lơngai. Rcang di tŭ, tơl làm tơl gah broă dong kờl, măi mok, priă jền drơng broă ai kơnòl broă cíñ trị mờ rài kis, rài kis pah ngai ai mpồl ling in. Pơndờm pơnđiang kwang bàng, cau lơh broă lơh jat niam jơnau bơceh lơh, lơh pa măi mok tơnguh uă cồng nha broă lơh, lơh sa kă bro".

Tŭ do, bơta tàm dà lềng geh uă bơta gơlik geh kal ke, kơnòl broă bơh Hải đoàn 129 dê ngai sơlơ kơn jơ̆ kơn jŭt ngan tài bơh ală bơta tàm tiah lơh pôs đồng mờ lơh broă ơnàng uă tiah, sùm tàm jàu kơnòl broă tam cah is, lơh broă jŏ ngai tàm dà lềng; rcang lài, măy mok rơndeh rơndồ, phan bơna kỹ thuật ờ dùl ròt bal... mơya mờ bơhiàn 45 nam bơtàu tơnguh mờ dờng pràn, Hải đoàn 129 neh sùm dờng pràn bal mờ ală tŭ tơngai bơtàu tơnguh bơh dà lơgar dê. Kwang bàng, cau ling, cau lơh broă bơh Hải đoàn dê sùm gĭt loh kơnòl broă geh jàu, rcang lài bơsong kal ke, pơnđơl pràn lơh ngan bơceh lơh, kơ̆ kơljap lơh broă tàm dà lềng lơh jat kơnòl broă geh jàu. Lơh broă lơh sa kă bro kung sùm lơh sir mờ sơr lèt gan khà broă jàu geh ai. Priă lơh geh mờ priă cồng nam tơnơ̆ jơnhoa rlau mờ nam lài, rài kis bơh kwang bàng, cau ling, cau lơh broă sùm gơguh uă.

Ală cồng nha mờ Hải đoàn 129 ling dà lềng dê lơh geh bơh tŭ tơngai 45 nam bơt bơtàu mờ dờng pràn neh pơgồp bơnah đơs nền broă lơh mpồl lơh sa kă bro bơh ling klàng dê sùm cèng wơl cồng nha tàm jơh bal 2 kơnòl broă sền gàr dà lơgar mờ lơh sa, mơkung lơh niam rlau tai bơhiàn “tam klăc bal, bơsong bơta kal ke, jơh nùs lơh broă tàm dà lềng, lơh sir jak ngan kơnòl broă sền gàr dà lơgar pơgồp bal mờ lơh sa”.