Nam bơsram do là nam sơnrờp Uông Hân ngài mờ hìu nàng ơm tơn tàm hìu bơsram. Jơnau bơsram sơnrờp ngan mờ kơnòm bơsram ơdŭ 6, kòn cau Mnông geh bơsram tàm hìu bơsram pa, ờ di là bơh sră măi, mờ kơrnoăt pal jăt tàm tiah ơm tơn tàm hìu bơsram, bè bơta sền gàr să tờm, kloh niam. Ală ngai sơnrờp mŭt bơsram, kòn ùr dềt do mờng pồn să tềng gah jơnờng ñìm is tài kah hìu. Ală tŭ bè hơ̆, pơgru atbồ ơdŭ bơsram sùm tus mờ pơn dờm, nàng oh gơlơh chờ hờp, ram tàm să mờ tơmù nùs nhơm kah hìu. Bơta do kung neh dong kờl ală cau mè bèp bè lŏ H’ Yến Bkrông, mè oh Uông Hân dê iang nùs tŭ pơyoa kòn mŭt bơsram tàm hìu bơsram do: “Mpồl ơdŭ 6 geh boh bơr tơn mờ pơgru, geh jơnau lơi pơgru yal tàm điện thoại, ñìm kah hìu ha là ờ kah jơnau bơsram pơgru ndrờm yal tàm điện thoại nàng he in git kòn gam bơsram bè lơi tàm hìu bơsram, den tàng iang nùs ngan. Tiah kis mờ bơsram tàp tàm hìu bơsram kung niam ngan den tàng he kung ờ kơlôi rơcang jơnau lơi”.

Gam gơwèt mờ ală kơnòm bơsram tàm ơdŭ dờng rơlao, Hìu bơsram kòn cau ơm ngai tơn kấp 2 kơnhoàl Lăk tŭ do neh mờng kwèng ngan mờ gơs hìu ơm bal bơh ală kơnòm bơsram dê. Tơl nă cau pơgru là cau mè cau bèp dơ̆ bàr, sùm tus nàng sền gàr, pơn dờm pơn điang, tam pà mờ bơto bơtê ală kơnòm bơsram tàm broă bơsram sră, bơsram tàp. Oh H’ Wion Sruk, bơsram ơdŭ 9 pà git: “Pơgru oh gơboh ngan mờ kơnòm bơsram mờ sùm sền gàr bol oh nền nòn ngan bơh broă dềt ngan bè kơ̆u ồi, pơs hìu mờ bơto uă bơta niam ndai. Oh gơlơh iang nùs nhơm, kung gơlơh kah hìu mơya geh broă sền gròi bơh ală cau pơgru bè hơ̆ den oh gơlơh iang đao”.

Mờ pơgru Hoàng Thị Bảy, 16 nam bơto tàm hìu bơsram kòn cau ơm ngai tơn kấp 2 kơnhoàl Lăk, tơngai pơgru ơm tàm hìu bơsram uă rơlao mờ tàm hìu tờm. Pơgru Bảy pà git, tài bơta krơi is là hìu bơsram kòn cau ơm ngai tơn den tàng ală kơnòm bơsram tàm hìu bơsram ndrờm bơsram sră mờ ơm kis tơrgùm bal bơh ngai dơ̆ bàr tus ngai dơ̆ poh, mìng tus ngai lồi poh hơ̆ sồng ală kơnòm bơsram geh cau mè bèp rò rê hờ hìu, geh tŭ mờ uă kơnòm bơsram gơtìp kal ke, hìu ngài ir, pah nam, broă rê tàm hìu ờ hoan geh ngan. Rơlao mờ hơ̆ tai, ală kơnòm bơsram gơwèt uă jơi bơtiàn tus bơh uă tiah krơi is, di lah pơgru ờ mùl màl wă, tam pà bal den kal ke ngan nàng ală kơnòm bơsram kờñ yal. Pơgru Hoàng Thị Bảy đơs: “Tài ală kơnòm bơsram là ală jơi bơtiàn krơi is. Ală kơnòm bơsram đơs mờ dà krơi is mờ bơta do bol añ pal wă jơnau đơs hơ̆. Nàng wă jơnau đơs den bol añ pal bơsram is nàng wă mờ geh jơnau đơs bal, bơta ndrờm bal đah ală kơnòm bơsram nàng geh jơnau tam pà bal, mờ ală kơnòm bơsram gŏ tàm hìu bơsram kung bè ơm tàm hìu sơl”.

Jăt pơgru Nguyễn Thị Thuỳ Diễm, Kwang atbồ hìu bơsram kòn cau ơm ngai tơn kấp 2 bàr kơnhoàl Lăk yal, nam bơsram 2023-2024, gùt hìu bơsram geh 152 nă kơnòm bơsram tus bơsram. Tàm hơ̆ geh 96% là kơnòm bơsram jơi bơtiàn ờ gal cau kis tàm kơnhoàl Lăk. Rài kis hìu nhă ală kơnòm bơsram gam uă kal ke. Den tàng tơl nă cau pơgru sùm geh ai, bơdìh mờ broă bơto den broă sền gàr kơnòm bơsram gam là kơnòl tờm bal mờ nùs nhơm kờñ gơboh. Tàm ơdŭ, ală cau pơgru là ală cau bơto sră nàng ală kơnòm bơsram in git wă. Rê bơh tàm ơdŭ tus tàm hìu ơm bal, ală cau pơgru kung bè ală cau mè, cau bèp drơng gàr ală oh kòn bơh să tờm dê bơh tàm ală dơ̆ sào sa tus mờ tŭ bĭc. “Pơgru tàm hìu bơsram kung bè kwang bàng, kông ñân viên sùm đềt mềr mờ ală kơnòm bơsram. Ală kơnòm bơsram tus tàm do bơh nam ơdŭ 6, kung bè kòn tờm he dê sơl. Den tàng ală cau pơgru, ală kwang bàng, cau lơh broă tàm hìu bơsram sùm lòt bal nàng bơto sồr nền nòn tŭ ală kơnòm bơsram mŭt bơsram”.

Bơh tàm nùs nhơm kờñ gơboh, sền gròi, drơng gàr bơh ală cau mè, cau bèp dơ̆ bàr do neh ai geh bơta pràn nàng ală kơnòm bơsram, bơsram tàm hìu bơsram kòn cau ơm ngai tơn kấp 2 bàr kơnhoàl Lăk lơh ngan bơsram sră, bơsram tàp mờ nùs nhơm pin dờn “Ngai do lòt bơsram ngài/Gùng rài tơnơ̆ do rềp”. Mờ tàm gơl gùng hơ̆, sùm geh broă tus bal, lòt bal, tam pà bal bơh ală cau pơgru tàm hìu bơsram dê.