Kông ty Hìu măi pờ tơlik ồs đèng lơh bơh dà Ialy atbồ, ai ngui 3 hìu măi pờ tơlik ồs đèng lơh bơh dà dờng tàm kai ntùng hìu măi pờ tơlik ồs đèng lơh bơh dà dà dờng Sê San, geh: Hìu măi pờ tơlik ồs đèng lơh bơh dà Ialy, Hìu măi pờ tơlik ồs đèng lơh bơh dà Sê San 3 mờ Hìu măi pờ tơlik ồs đèng lơh bơh dà Plei Krông, tàm càr Gia Lai mờ Kon Tum. Kờp jơh bơta pràn bơh 3 hìu măi do dê là 1 rbô 80 MW, kờp jơh khà ồs đèng pờ tơlik kờp tus ngai 30/6/2023 bơh 3 hìu măi dê geh rlau 102 tơmàn 246 tơlak kWh. Bulah bè hơ̆, tàm 6 nhai bồ nam 2023, jơh gùt kông ty lơh gơlik geh 1 tơmàn 955 tơlak kWh đèng, geh 41,68% broă rơndap lơh, gơmù 330 tơlak kWh pơn drờm mờ dùl tŭ bal mờ nam 2022.

Là hìu măi pờ tơlik ồs đèng lơh bơh dà dờng ngan rlau jơh tàm kai ntùng hìu măi pờ tơlik ồs đèng lơh bơh dà dà dờng Sê San, Hìu măi pờ tơlik ồs đèng lơh bơh dà Ialy neh lơh niam gơnoar broă bơh hìu măi uă jơnau kờñ dê, hơ̆ là lơh gơlik ồs đèng, tam pà dà ia, tơrmù dà kŏ dà cò tuh rê tàm nhai mìu nhàc; ai pà dà tiah đah jum in tàm kàl prang duh. Bal mờ hơ̆ gam drơng tơl dà ai broă ƀồm dà tàm tiah đah jum in kung bè ngui geh cồng nha dà ai pờ tơlik ồs đèng in. Ồng Đinh Viết Thiện, Phó Kwang atbồ Kông ty Hìu măi pờ tơlik ồs đèng lơh bơh dà Ialy đơs: “Kàl prang nam do trồ tiah tam gơl ờ niam ngan, tàm ală nhai lồi kàl mìu den dà tuh rê hờ tơnau gơmù. Tàm ală nhai 3 mờ nhai 4 den khà dà tuh rê hờ tơnau dùl êt ngan, gơmù mờr 90%. Den tàng geh tŭ tơngai khà dà tàm tơnau ờ tơl, nàng gàr tơl khà dà pal geh, kung bè là khà dà lơyah ngan rlau jơh tuh rê hờ tiah đah jum jat di mờ broă ai ngui ală tơnau dà dê. Bè đah Kông ty neh geh jơnau yal di tŭ mờ ală anih lơh broă atbồ dà lơgar, anih lơh broă kâp hơ đang là tập đoàn kung bè Ủy ƀan Ñân zân càr Gia Lai mờ Kon Tum ai tơlik broă rơndap lơh ngui bè lơi nàng tam pà ring dà, gàr niam jơnau kờñ là ai pà dà drơng ngui sa bơh làng bol dê in kung bè ai pà dà drơng broă lơh sa suơn sre in. Tus ngai 30/6 pa do, broă gàr sùm khà dà nàng gàr niam hiòng dà hòr tiah đah jum dê kung geh lơh niam sơl”.

Ồng Hồ Trung Đông, Ƀí thư Đảng ủy, Kwang atbồ Kông ty bơtàu tơnguh hìu măi pờ tơlik ồs đèng lơh bơh dà Sê San pà git: Kàl prang nam do khà dà tuh rê hờ tơnau gơmù pơn drờm mờ khà kờp bal uă nam, gơmù tus 15% pơn drờm mờ nam 2022. Tàm tŭ ai ngui den tŭ do hìu măi neh lơh jat tơl ală jơnau sồr ală hìu măi pờ tơlik ồs đèng lơh bơh dà dà lơgar dê. Bơta krơi is tàm hìu măi pờ tơlik ồs đèng lơh bơh dà Sê San là geh tơnau tam pà dà tơnơ̆ tua ƀin pờ tơlik ồs đèng. Den tàng bơt atam pà dà ai tiah đah jum in geh rơcang lài lam lơh mờ ờ huan lơh gơ rềng tus broă pờ tơlik ồs đèng. Ồng Hồ Trung Đông đơs: “Tàm broă rơndap lơh ngui ală tơnau dờng dà 215 bơh Thủ tướng Cíñ phủ dê nam 2018, geh jơnau sồr gơ wèt mờ bol hi là bè kàl prang bol hi pal gàr êt ngan rlau jơh là 195 khối tàm dùl brơs mat ai tiah đah jum in. Tàm tŭ ngui tơnau dơng dà den bol hi geh dùl tơnau tam pà dà nàng bơsong broă mờ tŭ bol hi pờ tơlik ồs đèng uă den dơng dà tàm hơ̆ mờ tŭ bol hi ờ pờ tơlik ồs đèng den rơp pờ bơh tơnau tam pà dà Sê San 4. Tàm tơngai pa do den bol hi lơh jat jơnau sồr bè broă rơndap lơh tiah đah jum nàng gàr tơl dà ai dà dờng Mekong in. Mờ kung geh tŭ kal ke ngan rlau jơh, tŭ ờ tơl dà nàng pờ tơlik ồs đèng jat ală hìu măi den bol hi yal Ủy ƀan dà dờng Mekong in, rơcang lài yal mờ Kụk Tài nguyên Môi trường dà nàng ală gah pơgồp bal mờ gơp tàm broă đơng pơlam”.

Kông ty Hìu măi pờ tơlik ồs đèng lơh bơh dà Buôn Kuôp atbồ 3 hìu măi pờ tơlik ồs đèng lơh bơh dà tàm ală kai ntùng hìu măi pờ tơlik ồs đèng lơh bơh dà Srêpôk đah 2 càr Dăk Lăk mờ Dăk Nông là: Hìu măi pờ tơlik ồs đèng lơh bơh dà Buôn Tua Srah, Hìu măi pờ tơlik ồs đèng lơh bơh dà Buôn Kuôp mờ Hìu măi pờ tơlik ồs đèng lơh bơh dà Srêpôk 3. Kờp jơh bơta pràn bơh 3 hìu măi ồs đèng dê là 580 MW. Ồng Nguyễn Đức, Phó Kwang atbồ Kông ty Hìu măi pờ tơlik ồs đèng lơh bơh dà Buôn Kuôp pà git: 6 nhai do, kờp jơh khà ồs đèng bơh 3 hìu măi dê gơmù là tài dà ờ tơl bơh lồi kàl mìu tơn mờ sơlơ ờ tơl tàm ală nhai 3 mờ nhai 4 pa do. Bulah bè hơ̆, bơta ai ngui jat broă rơndap lơh ală tơnau dơng dà bơh Hìu măi pờ tơlik ồs đèng lơh bơh dà Buôn Kuôp dê kung gam sùm geh lơh jat: “Kông ty neh rơcang lài pơgồp bal mờ anih tờm tam pà gùng che ồs đèng dà lơgar nàng tam pà dà, gàr tơl dà drơng jơnau kờñ ngui sa mờ broă lơh sa ai tiah đah jum in. Tus nhai 5, den dà gơmù lơyah gơ wèt mờ tơnau bồ tô Buôn Tua Srah, Kông ty neh geh jơnau yal bơta geh ngan tus Ủy ƀan Ñân zân càr nàng geh gùng dà pơlam lơh sa kung bè ngui dà gơ in dipal. Jat hơ̆ tàm nggùl nhai 5, neh geh broă rơndap lơh ring bal là yuh dà rê hờ tiah đah jum tàm khà dà lơyah ngan rlau jơh, dơng dà nàng drơng jơnau kờñ ai jơh gùt kàl prang in. Tus lồi nhai 5, den dà tàm tơnau dơng dà Buôn Tua Srah neh rê hờ khà dà jat jơnau sồr mờ broă rơndap lơh ngui ală tơnau dơng dà dê.”