Hìu Ràng tơlik Hoàng Sa gơ ơm tàm gùng Hoàng Sa, dùl tàm ală gùng jat kềng gah dà lềng niam ngan rlau jơh gơwèt sơnah ƀòn Thọ Quang, quận Sơn Trà, ƀòn dờng  Đà Nẵng. Ală ngai do, uă ngan kơnòm bơsram, cau bơsram dờng, ơruh pơnu, cau ling yau, năc lòt nhơl tàm lơgar mờ lơgar ndai bal mờ ală cau kờñ gơboh ring lơngai mờ bềng bơta kờñ gơboh bồt bơlào dà lềng ƀòn lơgar dê neh tus tàm do lòt sền, sền gĭt. Tus sền ală rùp hin, sră nggal bè Hoàng Sa mờ Trường Sa ràng tơlik tàm Hìu Ràng tơlik Hoàng Sa, bơyô Lê Khánh Ly, cau bơsram dờng Hìu bơsram Đại họk Sư Phạm Đà Nẵng, đơs:“Là dùl nă cau kơnòm să tŭ tus sền Hìu Ràng tơlik Hoàng Sa, dùl dơ̆ tai añ gĭt wă loh làng rlau tai bè gơnoar tờm bồt bơlào dờng màng bơh Dà lơgar dê, ngan là gơwèt mờ 2 bồt dờng Hoàng Sa mờ Trường Sa. Ală cau kơnòm să bè bol añ ngai sơlơ tơnguh uă rlau tai bơta gĭt wă, mblàng yal tus mờ ală cau gùt dar in pơn jat tai đơs nền gơnoar tờm bồt bơlào dà lềng dờng màng bơh Dà lơgar dê. Hoàng Sa mờ Trường Sa là bơh lơgar Việt Nam dê”.

Ală pang wăc sềr ù tiah, sră nggal yau, pơgap mờ do gĭt nđờ rơhiang nam mờ rùp hin, sră nggal tus mờ tơl nơm bràs, kơndoh koăt, kòn kràng..., jơh ală bơta hơ̆ là cơng tàng niam ngan broă lơh sơn tơ̆p jrong nhàr lơgar, lơh tơrñăng gơnoar tờm ù tiah bơh lơgar Việt Nam dê tàm 2 bồt dờng Hoàng Sa mờ Trường Sa. Do là ală cơng tàng kơ̆ kơl jăp ngan bè gơnoar tờm ù tiah bơh lơgar Việt Nam dê gơwèt mờ bồt dờng Trường Sa; gơnoar broă, kơnhoàl ù tiah, bơta kwơ màng bơh bồt bơlào dà lềng dê tàm broă lơh bơt bơtàu mờ sền gàr Dà lơgar. Trung uý Lê Xuân Thiêm, Phó Kwang atbồ Mpồl hòi jà làng bol, Pôs đồng ling sền gàr tiah nhàr lơgar Sơn Trà, Gah đơng lam Mpồl ling sền gàr tiah nhàr lơgar ƀòn dờng Đà Nẵng, pà gĭt:“Tàm tơngai do, kwang bàng, cau ling Pôs đồng ling sền gàr tiah nhàr lơgar Sơn Trà pơgồp bal mờ kấp ủy, gơnoar atbồ ală tiah, ală ƀan, ngàñ geh gơrềng sùm bơyai lơh ală dơ̆ mblàng yal. Bơh ală dơ̆ mblàng yal tơrgùm halà lơh is rah rài, bol añ đơs tus ală jơnau gĭt wă, tơngume geh gơrềng tus ală bơta bồt bơlào dà lềng lơgar Việt Nam dê. Bol añ sùm bơyai lơh ală broă lơh gàr niam rài kis mpồl bơtiàn ai làng bol lơh ka tàm ù tiah do in, pơgồp bơnah bal mờ làng bol lòt lơh ka tàm dà lềng, sền gàr kơ̆ kơl jăp gơnoar tờm bồt bơlào dà lềng bơh Dà lơgar Việt Nam dê”.

Hìu Ràng tơlik Hoàng Sa bơh Ủy ƀan Ñân zân kơnhoàl Trường Sa, ƀòn dờng Đà Nẵng dê atbồ. Đah đăp cờn hìu sền song tơn tus hờ đah Dà lềng đah mat tơngai lik, geh lơh tàm bă ù ơnàng mờr 1 rơbô 300 thơk vuông. Hìu Ràng tơlik sơnđờm mut lơh broă bơh nhai 03 nam 2018, pờ mpồng drơng broă ờ sa priă ai làng bol mờ năc lòt nhơl in. Pah nam, tiah do wă rò gĭt nđờ rơbô dơ̆ làng bol mờ năc lòt nhơl tus sền, jòi gĭt kah yau. Rlau 300 tàm khà gĭt nđờ jơ̆t rơbô sră nggal, phan bơna lời kir ràng tơlik tàm do là ală cơng tàng niam ngan bè gơnoar tờm bồt bơlào dà lềng bơh lơgar Việt Nam dê gơwèt mờ 2 bồt dờng Hoàng Sa mờ Trường Sa. Ồng Lê Tiến Công, Cáñ Văn phòng Ủy ƀan Ñân zân kơnhoàl Trường Sa, Kwang atbồ Hìu Ràng tơlik Hoàng Sa, pà gĭt: “Nàng drơng broă niam rlau tai jơnau kờñ bơh năc lòt sền mờ ală cau lơi sền gròi kờñ jòi gĭt bè bồt dờng Hoàng Sa, bol añ geh broă rơndăp lơh mờ kung neh lam lơh rơndăp broă lơh bè số hóa ală jơnau yal sră nggal mờ ù tiah ràng tơlik tàm Hìu Ràng tơlik Hoàng Sa tơmut tàm Wedsite bơh mpồl lơh broă dê nàng làng bol in gơtùi jòi gĭt jơnau yal tơngĭt sră nggal bè gơnoar tờm ù tiah bơh lơgar Việt Nam dê gơwèt mờ bồt dờng Hoàng Sa”.

Ồng Võ Ngọc Đồng, Kwang atbồ Sở Nội vụ mơkung là Củ tịc Ủy ƀan Ñân zân kơnhoàl Hoàng Sa, ƀòn dờng Đà Nẵng, đơs nền:"Bol añ sồr Hìu Ràng tơlik Hoàng Sa lơh broă lơh, broă rơndăp lơh lơh pràn broă lơh mblàng yal lơh geh bơta gĭt wă jrô ơnàng làm uă mờ tơnguh uă kơnòl tàm ală rơnàng làng bol bè gơnoar tờm bồt bơlào dà lềng, bồt dờng Hoàng Sa. Bol añ tàm bơrlŭ bal broă lơh mblàng yal mờ ală broă lơh lòt sền, jòi tơrgùm sră nggal, bơto bơtê kah yau ală tiah bơh ală hìu bơsram tàm ù tiah do dê. Bol añ pơgồp bal mờ Thàñ đoàn, Sở Giáo zụk mờ Đào tạo, Sở Zu lịc rcang lài ai sră nggal Hoàng Sa tus mờ năc lòt nhơl tàm lơgar mờ lơgar ndai in. Ngan là, bơyai lơh ràng tơlik ntrờn làm bă tiah tus ală hìu bơsram, hìu bơsram Đại họk, hìu bơsram kấp pe tàm ù tiah ƀòn dờng dê nàng kơnòm bơsram, cau bơsram dờng, rơnàng kơnòm să in geh gĭt mờ ală sră nggal, ală cơng tàng bè bơta ngan kah yau, kơrnoăt boh lam kung bè bơta geh ngan bè gơnoar tờm Hoàng Sa dê”.

Hoàng Sa mờ Trường Sa bơh gĭt nđờ rài do sùm là dùl bơnah kơnhoàl ù tiah poăc mhàm, dờng màng, ờ gơtùi tàm cah is mờ kơnhoàl ù tiah lơgar Việt Nam dê. Lơgar Việt Nam geh tơl làm ală cơng tàng kah yau, kơrnoat boh lam mờ sùm yal bơr, đơs nền gơnoar tờm ù tiah bơh lơgar Việt Nam dê gơwèt mờ 2 bồt dờng Hoàng Sa mờ Trường Sa.