“Kờp jơh ală broă lơh pơnrơ jak tàm broă bơsram mờ lơh jăt Wa Hồ bơh jơh ală kâp tàm làm gùt lơgar dê kờp tus nhai 04 pa do là rlau 25 rbô 500 broă”. Do là jơnau yal geh yal tàm Pơrjum gùt lơgar sền swì broă lơh jăt Jơnau đơs pơndŭt sồ 01 bơh Ƀộ Cíñ trị khoă XIII dê bè pơn jăt tai lơh jăt Jơnau sồr sồ 05 “Bè lơh pràn bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê” geh Ƀan Tuyên zăo dà lơgar bơyai lơh tàm ngai 12/06. Jơnau yal tàm Pơrjum pà gŏ, cồng nha lam lơh jăt Jơnau đơs pơndŭt sồ 01 bơh Ƀộ Cíñ trị khoă XIII dê tàm 02 nam do, ală càr, ƀòn dờng mờ ală anih lơh broă Dà lơgar neh geh broă rơndăp lơh bơsram kơlôi sơnơng mờ lam lơh jăt dùl bă jơh nùs, niam ngan. Bơh hơ̆, geh uă broă lơh rơcăng lài, ngăc ngar, bơceh lơh, uă broă lơh pa, broă lơh jak tàm uă tiah, pơgồp bơnah dong kờl broă lơh gơs ală broă jàu lơh sa- mpồl bơtiàn, sền gàr niam dà lơgar lơngăp lơngai, lơh broă mờ lơgar ndai, bơ̆t bơtàu Đảng mờ ală anih lơh broă cíñ trị. Kờp tus nhai 04 pa do, tàm jơh gùt lơgar geh rlau 25 rbô 500 broă lơh krơi is tàm broă bơsram mờ lơh jăt Wa Hồ. Tàm hơ̆ neh lơh geh, uă broă lơh pa, bơceh lơh, broă lơh jak tàm uă tiah…