Mŭt lơh tàm nam 2021 tài ală cau kơnòm să ñhăp ñhar, Kông ty kă bro Epis, kơnhoàl Mdrăk, càr Dăk Lăk kă bro ală bơta phan bơka să geh lơh bơh ală phan geh is tàm kơnhoàl do dê. Git geh bơta pràn bơh kông nghệ sồ, ală bơyô kơnòm să neh tus bal mờ cau blơi bơh tàm ală pang internet mpồl bơtiàn mờ dan cih măt khà phan kă bro tus tàm ală anih kă bro điện tử. Lŏ Lê Thị Hồng Thơm, Phó Kwang atbồ kông ty pà git: Tŭ do phan geh lơh bơh mpồl lơh sa kă bro neh geh tus tàm jơh ală anih kă bro điện tử ờs mờng geh gal cau blơi git tus mờ geh khà cau lơh broă bal uă bè: Shoppee, tiki, lazada,tiktokshop… Bơta do neh dong kờl mpồl lơh sa kă bro tơmù geh uă ngan priă tă yal phan kă bro. “Là dùl mpồl lơh sa kă bro mŭt lơh broă, den tàng kung gam uă bơta ờ pràn bè priă tă ơpah anih lơh broă den broă tăc phan tàm ală anih kă bro điện tử mờ internet neh là bơta pràn mờ dong kờl bol añ tềm pềr uă ngan priă tă tàm broă ơpah anih lơh broă ha là ală bơta mờ mpồl lơh sa kă bro ờ hềt geh lài”.

Kung rơwah broă tìp mờ pờ ơnàng drà kă bro bơh ală bơta kwơ bơh kă bro điện tử dê, Kông ty kă bro Kim Long, tàm kơnhoàl Krông Búk, càr Dăk Lăk neh mhargeh ală cau blơi phan bơh uă càr, ƀòn dờng tàm gùt lơgar. Ồng Đỗ Ngọc Anh, ala măt mpồl lơh sa kă bro pà git: “Phan geh lơh bơh añ den là phan pa, den tàng añ neh ai bơh tàm ală bơta geh bơh online dê là tờm ngan. Bơta do pal geh tus rơlao 50% khà priă geh bơh broă tăc phan tus bơh ală gah kă bro dê, bơh ală website tăc phan añ dê. Den tàng broă ngui website kung bè ală bơta geh online tàm broă tăc phan là dùl bơnah kwơ màng tàm broă kă bro bơh mpồl lơh sa kă bro añ dê”.

Jăt ồng Hoàng Minh Ngọc Hải, Kwang atbồ Anih tờm tơrbŏ bal mờ tam gơl sồ Mpồl tam klăc mpồl lơh sa kă bro càr Dăk Lăk yal, khà kờp tŭ do geh tus 70% khà kờp làng bol lơgar Việt Nam geh ngui internet mờ geh uă ngan cau là cau gam kơnòm. Broă blơi phan tàm ală gah kă bro điện tử rơhời gơs bơta mờng bơh cau ngui sa dê. Mpồl lơh sa kă bro gơtùi tus bal mờ dùl khà gal cau năc blơi phan. Mpồl tam klăc neh geh uă broă lơh mờ broă geh lơh jăt, dong kờl ală mpồl lơh sa kă bro càr Dăk Lăk tơrbŏ bal, tăc geh ală bơta phan, tàm hơ̆ uă ngan là phan geh lơh bơh suơn sre kơnhoàl dê tàm internet. Ồng Hoàng Minh Ngọc Hải pà git: “Bol añ neh pờ ơnàng mờ tơrbŏ bal mờ rơlao 28 anih lơh broă kông nghệ nàng lơh gơs dùl bơta niam geh tơl niam, pràn tàm pơrlòng nàng dong kờl mpồl lơh sa kă bro geh ală broă lơh niam ngan. Ală broă lơh do kung neh geh ai tơngŏ bè bơta ndơ̆p ndơr mờ geh cồng nha. Tŭ mpồl lơh sa kă bro geh lơh broă bal mờ ală mpồl lơh broă geh broă mờng chài, kung bè hòi jà tam gơl jơnau git wă rơhời añ geh pin dờn là mpồl lơh sa kă bro geh ală bơta gơkòl mờ broă kă bro điện tử gam cèng wơl mờ lơh geh ală cồng nha tàm gah lơh sa sồ”.