Do là nam geh khà jơnau sră ƀău tus bal pơrlòng uă ngan rlau jơh bơh lài tus tŭ do mờ bơta tus bal bơh 116 jơnau sră ƀăo bơh 78 nă cau cih ƀău, mpồl cau cih ƀăo dê, gơguh 24 jơnau sră ƀăo pơn drờm mờ dơ̆ pơrlòng nam lài. Cồng nha, Ủy ƀan Ñân zân càr Dăk Nông neh geh kơrnuat dờp 54 jơnau sră ƀău geh Khà jờng sră ƀăo càr Dăk Nông dơ̆ VII nam 2022 tàm 5 bơta sră ƀăo là pờ tơlik jơnau đơs, sơñio rùp, ƀăo lip, ƀăo điện tử mờ rùp sră ƀăo.

Ồng Võ Ngọc Tú, Củ tịc Mpồl cau lơh ƀăo càr Dăk Nông, Kwang atbồ Mpồl sền sơ wì jơnau cih ƀăo Dăk Nông yal, ală jơnau sră ƀăo tus bal pơrlòng sră ƀău càr dơ̆ VII uă rlau jơh bal bè khà mờ bơta niam pơndrờm mờ ală nam lài. Pal gròi sền là uă jơnau sră ƀăo neh ai tơnggŏ bơta lòt bal bơh sră ƀăo dê gơ wèt mờ broă lơh bơtàu tơnguh wơl, bơtàu tơnguh lơh sa tơnơ̆ kòp dờng Kovid-19.