Ală ngai do, hìu ồng Kpuih Plơk ờ ru ngan bal mờ làng bol kis tàm ƀòn Vơng Chép tơnhào kòi sre tàm ƀlàng sre xã Ayun. Ồng pà git, pơgăp mờ do 3 nam, geh kwang bàng lơh sa suơn sre bơh kơnhoàl, xã neh lòt tus tơl hìu nàng lam sồr làng bol tam gơl broă lơh sre bàr kàl. Làng bol geh bơto sồr tàm broă lơ-òr, sih, tam, sơnka sền gàr tus mờ broă tơnhào. Kàl lơh kòi nam do, ồng Kpuih Plơk kờp dŭ geh 3 tấn kòi, priă geh di pơgăp 30 tơlăk đong. “Lài do hìu añ ngui dà mìu, ờ tơl nàng lơh sre, ờ tơl nàng ngui sa. Geh Đảng, Dà lơgar sền gròi bơcri priă lơh rơbòng dà bơh bơtơ̆t dơng dà Plei Keo den tàng chờ hờp ngan. Tŭ do lơh kòi kàl prang 2 kàl, cau tàm hìu sa jơh kung gam jơnkah nàng tăc tai”.

Kung gam ờ ru ngan mờ broă tơnhào kòi tàm sre, ồng Kpuih Trái, kis tàm ƀòn Keo, xã Ayun, kơnhoàl Chư Sê kung gam chờ hờp ngan sơl. “Hìu añ geh 7 sào sre, tŭ ờ hềt geh dà den 7 sào sre tơnhào mìng geh 10 ƀào kòi, kơnờm mờ broă geh bơtơ̆t rơbòng dà Plei Keo, kàl lơh sa do geh 25 ƀào kòi tàm 1 kàl, bàr kàl là 50 ƀào. Lài do glar ngan tài dà ờ geh, tŭ do neh geh bơtơ̆t rơbòng dà lam dà tus, den tàng làng bol ƀòn lơgar chờ hờp ngan”.

Lài do tŭ ờ hềt geh bơtơ̆t rơbòng dà Plei Keo, gùt xã Ayun mìng geh di pơgăp  50 lồ ù lơh sre 1 kàl mờ gơrềng mờ trồ mìu lơm. Mơya bơh nam 2020 tŭ bơtơ̆t rơbòng dà Plei Keo geh lơh broă, bă ù lơh sre neh gơguh tus tŭ do mờr 200 lồ mờ geh lơh 2 kàl tàm 1 nam, cồng nha kòi kung gơguh uă mờ kơl jăp. Ồng Phạm Ngọc Tuấn, Phó Củ tịc UɃÑZ xã Ayun pà git, kòi neh rơhời dong kờl kơl jăp mờ tơnguh uă rài kis ai làng bol in. “Tơnơ̆ mờ tŭ neh geh bơtơ̆t rơbòng dà Plei Keo den làng bol lơh bơh 1 kàl tus 2 kàl mờ cồng nha den gơguh bơh 35 tus 65 tạ tàm 1 lồ. hơ̆ là bơta chờ, chờ hờp ngan bơh làng bol dê. Bơdìh hơ̆ tai, tài geh broă sền gròi bơh ală gah lơh broă tàm kơnhoàl dê, den tàng neh dong kờl ală sơntìl kòi geh cồng nha uă, bơto sồr bơta chài tàm broă sơnka sền gàr mờ tơnhào, tàm hơ̆ uă ngan là ai măi mok tus tàm broă tơnhào kòi den tàng cồng nha geh uă, priă geh ai làng bol in kung gơguh sơl”.

Xã Ayun tŭ do geh 6 thôn, ƀòn cau jơi bơtiàn ờ gal cau geh rơlao 90% khà kờp làng bol. Là xã gơtìp kal ke ngan càr Gia Lai dê, nam 2016, rơlao 75% hìu tàm xã Ayun gơwèt hìu rơƀah. Tus tŭ do, rài kis bơh làng bol neh rơhời gơguh, khà hìu rơƀah tàm xã mìng gam di pơgăp 13%. Nàng geh cồng nha do, bal mờ broă lơh ngan brồ guh bơh làng bol dê, là broă sền gròi, bơcri priă ndrờm bal bơh dà lơgar dê, tàm hơ̆ geh broă lơh bơtơ̆t rơbòng dà Plei Keo.

Mò Rmah H’Bé Nét, Phó Ƀí thư Thường trựk Huyện ủy, Củ tịc UɃÑZ kơnhoàl Chư Sê pà git, xã Ayun là tiah pôs đồng kăc màng, là xã khin cha jăk chài tàm rài tam lơh mờ khà làng bol jơi bơtiàn ờ gal cau geh 97%, ndrờm là kòn cau Jarai dê lơm. Lài do, tài ờ hềt git tàm broă tam phan mờ gơtìp trồ prang sùm gùt nam, den tàng xã Ayun kung gam là dùl tàm ală xã rơƀah ngai càr Gia Lai dê. Nhai 04 nam 2017, tàm dơ̆ tus còp mờ lơh broă tàm càr Gia Lai, Tổng Ƀí thư Nguyễn Phú Trọng ờ sŭ ngan bè ală bơta kal ke bơh làng bol kis tàm xã Ayun dê. Tơnơ̆ mờ tŭ sền jơh ală jơnau dan bơh kwang đơng lam tàm xã do dê, Tổng Ƀí thư neh đơng lam ală ƀộ, gah lơh broă dà lơgar bal mờ càr Gia Lai lơh mhar rơndăp broă lơh bơtơ̆t rơbòng dà Plei Keo, ai geh bơta niam nàng làng bol in geh dà ngui sa, geh bơtơ̆t rơbòng dà drơng tàm broă lơh sa nàng brồ guh. Mò Rmah H’ Bé Nét pà git: “Geh broă sền gròi uă ngan bơh Tổng Ƀí thư Nguyễn Phú Trọng dê, neh ai broă lơh bơtơ̆t rơbòng dà Plei Keo tus, lơh geh broă do pal đơs là làng bol chờ hờp ngan. Ai ƀlàng sre geh dà nàng làng bol gơtùi lơh kòi. Ala mờ lài do 1 nam lơh 1 kàl, mơya tŭ do neh geh rơbòng dà Plei Keo den làng bol gơtùi lơh 2 kàl tàm 1 nam, rài kis geh tơl niam. Tàm tơngai pa do, kơnhoàl kung neh sền bơh 5 nam do, geh gŏ geh bơta tam gơl bơh xã Ayun dê, rài kis làng bol neh bơtàu tơnguh niam”.

Geh lơh bơh nam 2018 tus bồ nam 2020 broă lơh bơtơ̆t rơbòng dà neh lơh gơs tơngai sơndờp mờ lam dà tus nàng tuh ai rơlao 200 lồ ù tam phan tàm xã Ayun in. Kơnờm mờ broă geh bơtơ̆t rơbòng dà Plei Keo, làng bol kis tàm xã Ayun neh tam gơl bồ tơngoh lơh broă sa, neh git tàm broă lơh sre bàr kàl den tàng rài kis neh geh tam gơl niam. Ờ mìng bơtàu tơnguh broă lơh kòi bàr kàl, bơh tŭ geh dà tuh, làng bol kis tàm xã Ayun kung neh bơtàu tơnguh broă ròng phan, mờ bơtàu tơnguh ờ uă sơntìl phan lơh sơnơm di pal mờ trồ tiah tàm do bè tờm bạk hà, điñ lăng… pơgồp bal tàm broă tơnguh geh uă priă ai làng bol in.