Tus mờ geh jơnau đơs tàm pơrjum, Kwang geh jơng tàm Ƀộ Cíñ trị, Thường trực Ƀan Ƀí thư Đảng dà lơgar ồng Võ Văn Thưởng sồr càr Kon Tum pal đờm jăt bơhiàn jăk chài kăc màng, sơrlèt mờ ală kal ke bơ̆t bơtàu càr tơnguh bơtàu mhar, kơl jăp.

Đơs jơnau tàm dơ̆ pơrjum tơnkah, ồng Dương Văn Trang, Kwang geh jơng tàm Đảng dà lơgar, Ƀí thư Tỉñ ủy, Củ tịc HĐÑZ càr Kon Tum yal wơl rài lài do, bơhiàn jăk chài kăc màng bơh càr Kon Tum dê tàm 110 nam bơ̆t bơtàu mờ tơnguh bơtàu. Mờ ù tiah kwơ màng, tàm ngai 09 nhai 02 nam 1913 Gơnoar atbồ Đông Dương tơlik Nghị định crơng gơs càr Kon Tum geh dùl tiah ơnàng tàm tiah hờ đah tô Tây Nguyên nàng tơnguh broă atbồ mờ kờñ tơnhào phan geh is.

Ờ bài mờ broă lơh dĭ lơgar Tây in, Làng bol ală kòn cau càr Kon Tum neh khin cha jăk chài ntào tam dră, tam klăc bal tam lơh mờ ling lơgar Tây sò tơm. Bal mờ broă crơng gơs bơh Ci ƀộ càr tàm lồi nhai 09 nam 1930, Kon Tum là tiah sơnrờp tàm Tây Nguyên crơng gơs mpồl Đảng Kộng sản. neh rơlao 2 dơ̆ tam lơh tam dră mờ ling lơgar Tây mờ lơgar Mỹ sò tơm, ling klàng bal mờ làng bol càr Kon Tum tềng đăp mờ broă đơng lam bơh Đảng dê neh khin cha bal mờ ling klàng gùt lơgar lơh geh ală cồng nha dờng ngan, pơgồp bal tàm bơta jai pha tam lơh Kàl prang nam 1975 tơrgùm dùl dà lơgar.

Tŭ do, càr Kon Tum geh 10 mpồl lơh broă sră nggal kấp kơnhoàl mờ khà kờp làng bol mờr 590 rơbô nă. Khà gơguh lơh sa càr sùm tàm khà uă; broă lơh sa tam gơl jăt gùng dà broă lơh niam; Khà hìu rơƀah gơmù gam hờ đơm 11%; rài kis phan bơna mờ nùs nhơm Làng bol dê geh gơguh. Pơnyờ să bè bơhiàn jăk chài kăc màng càr Kon Tum dê tàm 110 nam bơ̆t bơtàu mờ tơnguh bơtàu, Ƀí thư Tỉñ ủy, Củ tịc HĐÑZ càr Kon Tum ồng Dương Văn Trang đơs: “Bal mờ gùt lơgar, càr Kon Tum gam kơl jăp tàm gùng dà bơ̆t bơtàu mờ sền gàr Dà lơgar. Sền wơl tơngai 110 nam geh uă bơta pràn kơl dang, sơlơ ai he in wă rơlao tai mờ pơnyờ să rơlao bè rài lài do, git mờ đơs di bơta tŭ do, pin dờn kơl jăp tàm rài tơnơ̆ do àng sơrdah tàm gùng dà mờ Đảng, Wa Hồ bal mờ Làng bol he neh rơwah. He lơh ngan nàng rài niam dà lơgar geh àng sơrdah, di pal mờ rơnàng lài do git nđờ rơbô nam phi să nàng lơh geh jơnau kờñ bơ̆t bơtàu lơgar Việt Nam xã hội củ nghĩa “làng bol pas gơs, dà lơgar pràn kơl dang, lơh tờm, ndrờm bal, gơguh jăk”.

Đơs tàm pơrjum tơnkah 110 nam Ngai crơng gơs càr Kon Tum, Kwang geh jơng tàm Ƀộ Cíñ trị, Thường trựk Ƀan Ƀí thư Đảng Dà lơgar ồng Võ Văn Thưởng đơs tờm: Càr Kon Tum là tiah geh uă bơhiàn jăk chài rài lài do, bơta chài rơgơi. Sơrlèt rơlao git nđờ bơta kal ke bơh rài lài do dê, làng bol ală kòn cau càr Kon Tum neh bơ̆t bơtàu, sền gàr, đờm jăt nùs nhơm kờñ gơboh mờ dà lơgar, tam klăc bal, tơriang tơriồng, bơceh pa, khin cha, pràn kơl dang, jăk chài, dùl nùs jăt Đảng, jăt Wa Hồ lơh kăc màng, pơgồp bal tàm broă lơh àng sơrdah rài jăk chài bơh dà lơgar he mờ ù tiah Tây Nguyên ñhoa ơnàng.

Nàng càr Kon Tum pơn jăt tai tơnguh bơtàu mhar mờ kơl jăp, Thường trựk Ƀan Ƀí thư Đảng Dà lơgar ồng Võ Văn Thưởng ai geh ờ uă tơngu me nàng ală kấp ủy, mpồl đảng, gơnoar atbồ, Mặt trận Dà lơgar, mpồl lơh broă càr Kon Tum sền gròi tàm tơngai tus, hơ̆ là: “Ală kấp ủy, mpồl đảng, tơl nă kwang bàng, đảng viên bal mờ làng bol ală kòn cau tàm càr pal git tơl gơnoar, broă lơh, bơta geh, bơta kwơ, bal mờ ală kal ke, bơta lòng, ai geh ală jơnau bơsram broă mờng chài kwơ màng tàm broă tam dră tơnklàs dà lơgar, bơ̆t bơtàu mờ sền gàr ƀòn lơgar ală nam do; ngui niam bơhiàn ờs mờng chài rơgơi, rài lài do, kăc màng càr dê, lơh pràn kơl dang bồ tơngoh, nùs nhơm kơ̆p kờñ brồ guh, lơh gơs bơta pràn, lơh broă mùl màl bơh tơl mpồl đảng, bơh tơl nă kwang bàng, đảng viên mờ Làng bol, dùl bơta pràn, dùl nùs sơrlèt mờ ală kal ke, bơ̆t bơtàu ƀòn lơgar càr Kon Tum tơnguh bơtàu mhar, kơl jăp mờ niam bơnĕ rơlao”.

Bal mờ hơ̆, Thường trựk Ƀan Ƀí thư Đảng dà lơgar ồng Võ Văn Thưởng kung sồr càr Kon Tum pơn jăt tai tam gơl pa broă lơh gơguh lơh sa, tam gơl pràn broă lơh sa jăt gùng dà tơnguh bơtàu di pal mờ bơta uă bal mờ bơta niam nàng tơnguh bơtàu kơl jăp, sền gàr tiah kis; gơdờp mờ tam gơl trồ tiah; pal drơng gàr, prăp gàr mờ ngui niam bơta kwơ rài lài do, phan lời wơl tềl kah yau chài rơgơi ală kòn cau, pơgồp bal mờ broă tơnguh bơtàu nhơl chờ; tơrgùm yal mblàng, lam sồr làng bol sơbì ală bơhiàn ờ niam, ờ di pal; brồ guh nùs nhơm pơnyờ să, bồ tơngoh, nùs nhơm kơ̆p kờñ sơrlèt mờ kal ke bơh làng bol ală kòn cau dê tàm broă bơ̆t bơtàu mờ sền gàr ƀòn lơgar, dà lơgar; sền gròi broă gàr niam dà lơgar, kơl jăp bơta lơngăp lơngai cíñ trị, lơngăp lơngai mpồl bơtiàn tàm càr...

Tàm dơ̆ pơrjum tơnkah 110 nam Ngai crơng gơs càr Kon Tum kung neh yal mờ dờp kơrnoăt bơh Thủ tướng Cíñ phủ dê dờp ƀòn dờng Kon Tum là Tiah drà khà II gơwèt càr Kon Tum dê. Tơnơ̆ mờ bơnah pơrjum geh bơyai lơh đơs crih tamya geh tơngu me “Lòt tus hờ tiah đah măt tơngai” mờ chu phăo bơkào chờ gờm càr Kon Tum 110 nam bơ̆t bơtàu mờ tơnguh bơtàu.