Dơ̆ pơrlòng jơh bơsram kấp pe nam do, càr Kon Tum kờp jơh geh 5 rơbô 28 nă cau pơrlòng, tàm hơ̆ geh 1 rơbô 722 nă cau pơrlòng là kòn cau. Mờ broă lơh ngan ờ lời cau pơrlòng lơi tài bơta kal ke mờ ờ gơtùi tus bal pơrlòng, gơnoar atbồ bal mờ gah lơh broă geh gơnoar tàm càr Kon Tum neh geh uă broă lơh nàng dong kờl cau pơrlòng, bơh broă bơsram wơl jơnau bơsram tus mờ ală ngai cau pơrlòng lòt pơrlòng.

Tŭ do, Tỉñ đoàn Kon Tum neh lơh geh 5 mpồl lơh broă nùs nhơm dong kờl tus mờ kàl pơrlòng, bơyai lơh sền wơl, dong kờl cau pơrlòng geh rài kis gơtìp kal ke, cau pơrlòng bơh tiah ngài, tiah nhàr dà lơgar; gơnoar atbồ bal mờ gah bơto bơtê mờ bơsram 10 kơnhoàl, ƀòn dờng tàm càr do kung neh lơh jăt broă dong kờl cau bơsram geh rài kis gơtìp kal ke, cau pơrlòng kòn cau bè priă ngui sa tàm tơngai bơsram wơl jơnau bơsram mờ rơndeh lòt, anih ơm mờ sa tàm tơngai tus pơrlòng.