Tàm ală dơ̆ mblàng yal, ală kwang bàng, cau lơh broă neh geh yal dùl êt bè bơta geh ngan lơngăp lơngai lòt rê tàm gùng, lơngăp lơngai lơh broă tàm gah ồs đèng mờ tàm càr Dăk Lăk; ală jơnau cih bơh adat boh lam dê bè lơngăp lơngai lòt rê tàm gùng, niam chài lòt rê tàm gùng, adat lơh broă… Kuơmàng bơh broă mblàng lơh loh bè 2, 3 broă lơh tìs, ală dơ̆ rềs àr gùng lòt ù gờl mùl màl, ală kwang bàng kảñ sát gùng lòt neh dong kwang bàng, cau lơh broă gah ồs đèng geh tai jơnau git wă, pơlam bơta chài lòt rê tàm gùng nàng pleh ală rềs àr pơlai soh ngan digơlan gơlik geh.

Geh git, broă lơh mblàng yal, bơto pơlam adat boh lam bè lơngăp lơngai lòt rê tàm gùng, lơngăp lơngai lơh broă là broă lơh sùm bơh gah ồs đèng Dăk Lăk dê, pơgồp bơnah tơnguh jơnau git wă, kơnòl broă bơh kwang bàng, cau lơh broă dê tàm tŭ lòt rê tàm gùng, lơh broă, lơh sa, lam lơh niam broă pờ tơlik ồs đèng ring niam, lơngăp lơngai.