Gam ờ ru bal mờ cau tàm hìu pĭc plai kơphe tàm suơn kơphe 1 lồ neh dum uă, bi Siu Hồng Phát, kis tàm ƀòn Ngó, xã Ia Pia, kơnhoàl Chư Prông, càr Gia Lai chờ hờp đơs: “Tŭ do tàm hìu añ ờ geh cau lơh broă, añ pĭc tăc ris, priă nam do tăc geh 12 rơbô 400 đong. Cau lơh broă sa nam do đơs bal là pơn drờm mờ ală nam lài, giă tăc kơphe nam do geh uă, den tàng làng bol lơh broă sa bol añ chờ, chờ hờp ngan”.

Tàm thôn Ia Sâm, xã Ia Ròng, kơnhoàl Chư Pưh, ồng Lê Văn Kỳ kung gam pĭc plai tàm suơn kơphe geh 1 rơbô 500 tờm sơl. Ồng pà git, nam do khà geh kờp dŭ 30 tấn plai ris. Tơnhào geh uă, giă tăc kung gơguh sơl pơn drờm mờ uă nam lài, den tàng ồng chờ hờp ngan: “Giă tăc tŭ do gơguh uă pơn drờm mờ ală nam lài. Kơphe kung geh tơnhào, ờ gơtìp ờ geh tơnhào. Làng bol chờ hờp ngan”.

Tŭ do, tàm càr Gia Lai geh di pơgăp 97 rơbô lồ ù tam kơphe gam tàm tơngai geh plai. Geh uă bă ù do neh geh tam wơl mờ ală sơntìl pa. Giă tăc kơphe tŭ do gam geh bơh 57 tus 60 rơbô đong tàm 1 kĭ gar, gơguh di pơgăp 30% pơn drờm mờ tŭ do nam 2022. Giă tăc kơphe gơguh uă dong kờl làng bol gơguh bơta kwơ, chờ hờp tàm kàl tơnhào. Ồng Lê Thành Trung, kis tàm xã Ia Le, kơnhoàl Chư Pưh, càr Gia Lai pà git: “Làng bol chờ hờp ngan. Ală nam lài, kơphe gơmù priă tăc, làng bol kơl. Nam do, hìu lơi gam geh kơphe, tăc geh giă den geh uă ngan, khà tơnhào kơphe nam do kung geh uă sơl. Den tàng làng bol chờ hờp ngan”.

Tàm càr Dăk Lăk, do là tiah tam geh uă kơphe gùt lơgar dê, làng bol lơh broă sa kung gam tàm tơngai tơnhào kơphe kàl lơh sa 2023-2024. Nam do, kơphe tăc geh priă, geh tơnhào uă, làng bol lơh broă sa càr Dăk Lăk chờ hờp ngan. Ồng trịnh Hoài Viện, kis tàm xã Hoà Đông, kơnhoàl Krông Păc bal mờ mpồl cau gam tơrgùm pĭc plai kơphe. Ồng Viện pà git, hìu ồng tam geh 1 rơbô 100 tờm kơphe gam tàm tơngai geh plai, kàl lơh sa do cồng nha geh uă rơlao, mờ priă tăc gam tàm khà 63 rơbô đong tàm 1 kĭ, ờ kờp priă tă lơh, hìu ồng geh priă cồng di pơgăp 160 tơlăk đong. “Nam lài kơphe ờ niam rơlao mờ tơnhào geh 4 tấn 3 tạ, mơya nam do kơphe plai uă rơlao, di gơlan tơnhào geh bơh 4 tấn nggùl tus 5 tấn kơphe gar. Tŭ do kơphe tăc gam gơguh, tàm bơh rơlao 60 rơbô đong, hìu añ ờ hềt tăc, kơ̆p tus tŭ lơi kờñ geh priă ngui den tăc kung di sơl”.

Gam hìu ồng Y Hoang Ayun, kis tàm xã Cuôr Dăng, kơnhoàl Cư̆ Mgar geh suơn kơphe tam pa wơl neh nam dơ̆ 8 ơnàng 2 lồ. Ồng yal nam do priă cau pĭc plai neh gơguh uă tàm pơgăp 10%, mơya cồng nha geh uă mờ priă tăc gơguh uă den tàng cau tam kơphe kung gam geh uă priă. “Tŭ do, mìng is bè broă ơpah cau pĭc den pal hòi jà lài hơ̆ sồng geh. Priă ơpah den pal bơh 250 rơbô đong tàm 1 nă 1 ngai, mờ geh bal piang sào ngai. Ală hìu ờ jà lài cau den tŭ do ờ ơpah geh cau pĭc, mờ pal kơ̆p tus lồi kàl hơ̆ sồng ơpah geh cau pĭc”.

Xã Cuôr Dăng, kơnhoàl Cư̆ Mgar geh mờr 2 rơbô 500 lồ ù tam kơphe. Jăt ồng Y Sĕ Niê, Phó Củ tịc UɃÑZ xã Cuôr Dăng yal, giă tăc kơphe geh kơl jăp sùm là bơta ai tơngŏ chờ ngan, làng bol iang nùs tàm broă lơh sa, tơnguh uă bơta bơkah kơphe: “Tàm tơngai tus, xã geh mblàng yal, lam sồr làng bol gàr kơl jăp bă ù tam kơphe, ală suơn tam kơphe neh kra den pal tam pa wơl mờ sơntìl pa nàng geh cồng nha tơnhào uă. Broă tam bơrlŭ bal tờm sầu riêng tàm suơn kơphe kung niam, mơya mìng gam tam bơrlŭ tàm bă ù di pal mờ bañ rồ sơbì tờm kơphe”.

Gùt càr Dăk Lăk tŭ do geh di pơgăp 213 rơbô lồ ù tam kơphe, khà tơnhào geh kờp dŭ tàm kàl lơh sa do rơlao 570 rơbô tấn, gơguh di pơgăp 7% pơn drờm mờ kàl lài. priă Giă tăc kơphe gam geh sùm kơl jăp tàm khà uă là bơta pràn nàng làng bol lơh broă sa càr Dăk Lăk pơn jăt tai đềt mềr mờ tờm kơphe mờ wèt tus jơnau kờñ lơh kơphe ngai sơlơ kơl jăp rơlao. Jăt jơnau đơs bơh gah lơh sa suơn sre càr dê, khà tơnhào kơphe gơguh tài kàl lơh kơphe nam do tìp uă bơta ƀuơn, mìu ờ uă, trồ tơngai ndrờm bal, bơta bơkah kơphe geh tơl. Bơdìh hơ̆ tai, geh uă bă ù tam pa wơl kơphe ngui sơntìl pa neh geh tơnhào, pơgồp bal tàm broă tơnguh cồng nha geh, bơta kwơ, khà geh bơh kơphe dê.