Bơh bơngă pin dờn bơh he mờ bơta pràn jak bơh he dê, ồng neh geh uă ngan tă pơgồp nàng bơ̆t bơtàu ƀòn lơgar pa pas sơm niam bơne.

Tàm bơ̆t bơtàu ƀòn lơgar pa, Kra ƀòn ồng Puih Duch ơm tàm xã Ia Der, kơnhoàl Ia Grai, càr Gia Lai bal mờ kwang bàng xã, ƀòn jơh nùs ngan mblàng yal, hòi jà làng bol lơh gùng, ờng chi sơntìl nàng tam chi lơh pơngàr, lơh pràn tàm pơrlòng lơh broă lơh sa, kă bro jak, hòi jà làng bol lơh pas dipal. Bơh ală broă lơh ngan ngồn tàm rài kis, tàm ƀòn Jut 2 ồng geh uă ngan làng bol ki ngàm mờ lùp bơsram. Ồng Ksor Du là làng bol ơm tàm ƀòn Jut 2, yal wơl: Nam 2017, kra ƀòn ồng Puih Duch yal làng bol in là ƀòn neh geh Dà lơgar dong kờl 1 tơmàn 300 tơlak đong nàng lơh dùl nơm gùng jòng 1 kơi sồ 3. Kra ƀòn neh hòi jà uă hìu bơnhă làng bol tàm ƀòn pà ù lơh gùng, bal mờ gơ̆p tàm sơmbăt tê bal bơ̆t bơtàu ƀòn lơgar pa, să tờm kra ƀòn neh pà dùl bơnah ù bơh hìu bơnhă dê nàng gùng geh lơh gơs. Kơnờm bơta dùl nùs bal mờ bơta jơh nùs bơh kwang bàng mờ làng bol dê, tus tŭ do, ƀòn neh geh dùl nơm gùng pa niam bơnĕ ngan. Gùng ƀê tông neh dong làng bol in lòt rê ƀươn ƀoài rlau, broă jun pơndiang mờ tăc phan lơh geh bơh sươn sre bơh làng bol dê geh ƀươn soh rlau. Ƀòn Jut 2 ờ mìng lơh jơh ală broă jàu bơ̆t bơtàu ƀòn lơgar pa lơm mờ gam geh sac rwah lơh lài ƀòn lơh krơh bơ̆t bơtàu ƀòn lơgar pa nàng ală ƀòn ndai tàm xã in lòt còp sền mờ lùp bơsram. Ồng Ksor Du, đơs: Đơs bè bơta lơh krơh lam lài bơh kra ƀòn ồng Puih Duch dê, làng bol cau lơi kung gơboh kờñ lơm mờ sền ki ngàm. Kra ƀòn là cau sùm jăt sền, pơndờm pơnđiang nùs nhơm làng bol kơ nùs tàm broă lơh broă sa nàng bơtàu tơnguh rài kis mờ bơtàu tơnguh ƀòn lơgar ngai sơlơ niam bơnĕ rlau, làng bol tàm do cau lơi kung dòn bơr kra ƀòn dê lơm mờ sùm ơm kis niam jăt krơh niam kra ƀòn dê.

Kra ƀòn ồng Puih Duch neh geh tŭ ăt uă ngan gơnoar broă kwơmàng tàm ƀòn lơgar, bè: Củ tịc Ủy ƀan Ñân zân xã Ia Der; Kwang ătbồ Kwang àng xã; Ƀí thư Ci ƀộ mờ tŭ do ăt gơnoar broă Kwang ătbồ Mpồl lơh broă mặt trận, là cau geh bơngă pin dờn bơh ƀòn Jut 2 dê. Là dùl nă đảng viên, ồng Puih Duch sùm tơngŏ là “cau lơh kòn gùng”, ai ală jơnau sồr, gùng dà broă lơh bơh Đảng mờ Dà lơgar dê tus mờ làng bol. Ồng Puih Duch, yal: Añ là cau lơh kòn gùng, làng bol dòn kơnờm den añ gam lơh. Ală jơnau sồr, gùng dà broă lơh bơh Đảng mờ Dà lơgar dê den añ kung mhar ngan lòt yal wơl làng bol in nàng lơh bè lơi mờ rài kis ngai sơlơ jak chài rlau, hờm ram rlau, ƀòn lơgar ngai sơlơ bơtàu tơnguh rlau tai. Rlau mờ hơ̆ tai, làng bol ờ gŏ di iăt jăt jơnau bơchồt bơh cau ờ niam dê lơh roh bơta tam klăc, bal mờ hơ̆ den jơh ală hìu kờñ pal ai kòn in lòt bơsram wil tơl nàng geh bơta gĭt wă, bơh hơ̆ bơ̆t bơtàu ƀòn lơgar dà lơgar pas sơm pràn kơldang.

Ồng Siu Hnit, Phó Củ tịc Ủy ƀan Ñân zân xã Ia Der, pà gĭt: Mờ bơta jơh nùs jơh tồr, kra ƀòn ồng Puih Duch sùm lam lài tàm ală srơh, broă lơh bơh ƀòn dê, pơgồp bal mờ ală anih lơh broă cíñ trị kâp hơđơm, hòi jà làng bol lơh jăt niam ală jơnau sồr, gùng dà broă lơh bơh Đảng mờ Dà lơgar dê. Tàm hơ̆, cồng nha ngan rlau jơh tàm broă lơh mblàng yal là ală srơh: “kis niam tàm rài kis lơh àng sơrdah jơnau yàng”; “bơ̆t bơtàu ƀòn lơgar pa”; “sang tĕ jơnau bau gờñ ờ hềt tơl sơnam ai bau”; “bau mờ cau rềp jơi nòi bal”; “bơtàu tơnguh lơh sa hìu bơnhă”...Ồng Siu Hnit, Phó Củ tịc Ủy ƀan Ñân zân xã Ia Der, đơs: Đảng viên ồng Puih Duch tàm ƀòn Jut 2 là cau geh bơngă pin dờn, sùm mblàng yal ală jơnau sồr, gùng dà broă lơh bơh Đảng mờ Dà lơgar dê. Ală dơ̆ pơrjum, ồng ndrờm cih wơl tàm sră pơ àr nền nòn ngan mờ rê yal wơl làng bol tàm ƀòn in bal mờ ală broă bè lơh sa, bơto bơtê, lơngăp lơngai sền gàr dà lơgar, pơgồp bơnah là cau tờm dong xã in lơh geh ală broă jàu bè ƀòn lơgar pa. Ồng là cau niam, krơh niam geh làng bol kờñ gơboh ngan.

Ia Grai là kơnhoàl tiah nhàr lơgar, geh 13 xã, thị trấn bal mờ 150 thôn, ƀòn, mpồl làng bol tiah drà, tàm hơ̆ geh 92 ƀòn làng bol jơi bơtiàn dùl êt nă cau. Ală nam do, ală kra ƀòn, cau ătbồ thôn mờ cau geh bơngă pin dờn neh geh ală tă pơgồp uă ngan tàm broă tus bal bơsong ală broă lơh sa- mpồl bơtiàn, bơ̆t bơtàu rài kis niam chài, gàr niam lơngăp lơngai rơndăp tăp sèng, sền gàr mờ ngui niam bơhiàn niam chài krơi is jơi bơtiàn dê, lơh jăt tam klăc dờng ală jơi bơtiàn. Ồng Trương Thế Vinh, Kwang ătbồ Cơldŭ lơh broă Jơi bơtiàn kơnhoàl Ia Grai, đơs: Ồng Puih Duch là krơh pơnrơ bơh kwang bàng mặt trận dê, ồng sùm lơh gơs niam kơnòl broă geh jàu, kwơmàng ồng lơh niam gơnoar broă là cau lơh kòn gùng nàng mblàng yal hòi jà làng bol tàm broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau in, tàm hơ̆ geh broă lơh jăt rơndăp broă lơh tơrmù ƀà bau gờñ, bau mờ cau rềp jơi nòi bal tàm tiah làng bol jơi bơtiàn dùl êt nă cau, ngan là broă lơh jơi bơtiàn. Tàm ală tŭ lơh broă den bol añ kung gĭt geh gơnoar broă mờ kơnòl broă bơh ồng dê gơ wèt mờ làng bol tàm ƀòn lơgar.

Mờ ală tă pơgồp bơh he dê, kra ƀòn ồng Puih Duch chờ hờp geh dờp uă sră jờng rơ dờng, dềt bơh ală kâp dê bơh Dà lơgar tus ƀòn lơgar. Pa do ngan rlau jơh là tàm nhai 09 nam 2022, ồng chờ hờp geh Củ tịc Ủy ƀan Ñân zân càr Gia Lai pà sră jờng rơ tài bơh neh geh ală cồng nha jak ngan tàm broă bơtòm tơrgùm bơ̆t bơtàu mpồl tam klăc dờng jơi bơtiàn tàm tiah ơm kis.