Tơrgùm kơryan ală bơta cau tìs tung kơñau, ai càn priă sa priă cồng uă, tac bro phan ờ ngan, phan đòm, phan ờ niam, phău bơrtoh; sơlơ tơnguh tai lòt sền, gròi sền, gàr niam lơngăp lơngai lòt rê tàm gùng… Do là ală kơnòl broă tờm geh Kwang àng càr Dăk Lăk lam lơh tàm dơ̆ lơh broă uă kơryan cau tìs, gàr niam lơngăp lơngai, rơndap tap sèng ring lơngai lài mờ tŭ, tàm tŭ mờ tơnơ̆ sa tềp bơhiàn yau Giáp Thìn 2024. 

Jat hơ̆, dơ̆ lam lơh broă uă kơryan cau tìs sền gàr lơngăp lơngai, gàr niam rơndap tap sèng ring lơngai dơ̆ do geh Kwang àng càr Dăk Lăk lam lơh bơh ngai 15/12/2023 tus ngai 29/02/2024. Jơh gùt mpồl rơp tơrgùm git broă gơlik geh tàm kâp hơ đơm, sơlơ lòt sền, di tŭ git gŏ, tam dră mờ ală cau dră wơl mpồl lơh broă, ờ lời gơlik geh sò tơm iơh bơsak, tàu dră, lơh aniai tus lơngăp lơngai, sền gàr lơngăp lơngai ai ală anih kuơmàng in. Lam lơh lòt sền tàm ù tiah ƀòn lơgar, ngan là ù tiah kuơmàng, hòi jà uă ngan rlau jơh mpồl lơh broă, phan bơna, ală broă lơh mờng chài kơryan ală bơta cau tìs.