Di tơngkah 98 nam Ngai sră ƀău kac màng Việt Nam (21/6/1925- 21/6/2023), drim ngai 20/6, Kwang àng càr Dăk Lăk bơyai lơh tìp mat ala mat ală anih lơh ƀău lơh broă tàm càr. Tàm do, Kwang đơng lam bồ Kwang àng càr Dăk Lăk pà git neh kup 74 nă cau tàm broă sò tơm tàm anih lơh broă Ủy ƀan Ñân zân 2 xã tàm kơnhoàl Cư Kuiñ pa do.

Tàm dơ̆ tìp mat, Thiếu tướng Lê Vinh Quy- Kwang atbồ Kwang àng càr Dăk Lăk pà git, tơnơ̆ broă mpồl cau sò tơm anih lơh broă Ủy ƀan Ñân zân 2 xã Ea Tiêu mờ Ea Ktur, gơ wèt kơnhoàl Cư Kuiñ tàm mang ngai 11/6 lơh 2 nă kwang bàng xã, 4 nă kwang àng xã chơt phi să mờ 2 nă kwang àng gơtìp sồt să, 3 nă làng bol gơtìp chơt să; tus tŭ do, anih lơh broă geh gơnoar neh kup 74 nă cau geh gơ rềng. Tŭ do, broă lơh lùp khàu, jòi kup kung gam geh lơh jal mhar. Kwang àng càr kung jơh nùs pơgồp bal mờ mpồl lơh broă geh gơnoar gàr lơngăp lơngai anih lơh broă, sơlơ tơnguh broă mblàng yal tus ală rơnàng làng bol iang nùs, gàr kơ̆ kơljap broă lơh sa.