Ồng Nguyễn Trọng Nghĩa pơyoa jơnau chờ gờm niam bơnĕ ngan di Tơnkah 68 nam ngai Cau lơh sơnơm Việt Nam tus ală rơnàng cau lơh sơnơm, bal mờ ală kwang đơng lam mờ gùt kwang bàng, kông cứk, viên cứk tàm 2 hìu sơnơm do.

Tam pà bal mờ ală kal ke, bơta lòng mờ jơnau dan bơh kwang đơng lam 2 Hìu sơnơm dê, ồng Nguyễn Trọng Nghĩa đơs là, tơngai tus gah lơh sơnơm pal gơtìp mờ uă kal ke, bơta lòng, den tàng ală y, ƀák sĩ pal pơn jăt tai lơh ngan, tơmù ală kal ke, ngui niam bơta ngăc ngar, bơta jăk chài tàm broă lơh bơh să tờm dê, gàr niam nùs nhơm cau lơh sơnơm, tơnguh uă bơta niam kơlôi sơnơng khoa họk, bơto bơtê kwang bàng pơgồp bal mờ lơh sa, drơng rài kis, tơnguh uă priă geh ai mpồl kwang bàng, y, ƀák sĩ lơh broă sền gàr mờ tơnguh uă bơta pràn kơl dang să jan làng bol. Nàng bơh tŭ hơ̆, di pal là ală hìu sơnơm lam lài gùt lơgar dê.