Mho ngai 19/06, Ƀí thư Đảng Dà lơgar, Kwang ătbồ Ƀan Tuyên zăo Dà lơgar ồng Nguyễn Trọng Nghĩa lam bồ mpồl lơh broă Ƀan Tuyên zăo Dà lơgar lòt còp mờ gờm chờ jơh ală kwang bàng đơng lam bồ, cau lơh ƀăo, cau sền swì jơnau cih ƀăo, cau sền jơnau, kông ñân viên cưk, cau lơh broă bơh VOV dê di dơ̆ tơngkah kir sơnrai 98 nam Ngai Sră ƀăo Kăc màng Việt Nam (21/06).

Jờng rơ ngan VOV là dùl tàm ală anih lơh sră ƀăo tờm kwơmàng sùm geh uă tam gơl pa pràn kơldang nàng lơh pràn broă lơh mblàng yal, nàng jơnau đơs pờ tơlik bơh VOV dê ngai sơlơ geh uă cau iăt ờ mìng gơwèt mờ ù gờl, dà lềng bồt bơlào, gơwèt mờ làng bol ơm tàm tiah nhàr lơgar, tiah sar lơgar ngài mờ kwơmàng gơwèt mờ mpồl bơtiàn cau Việt Nam ơm tàm lơgar ndai tai, ồng Nguyễn Trọng Nghĩa tơngkah: Bơta lơi neh lơh gơtùi rao den bol he pal jơh nùs prăp gàr mờ pal lơh niam rlau tai. Jơnau đơs pờ tơlik bơh VOV dê pờ tàm Trường Sa mờ tiah Tây Nguyên niam ngan. Tài bơh do ờ mìng cèng bơta lơh rài bồ tơngoh lơm halà yal tơngĭt jơnau lơm mờ gam là kơnòl broă sền gàr Dà lơgar, đơs nền gơnoar tờm ù tiah bol he dê, dong kờl rềs àr mờ bơsong uă jơnau digơlan gơlik geh ndai tai…Kung kơ̆p kờñ ală oh mi gàr gùng lòt kơ̆ kơl jăp bè hơ̆.