Do là jơnau tơnggit geh yal tàm Pơrjum cau yal jơnau dà lơgar nhai 6 nam 2023 bơh Ƀan Tuyên giáo dà lơgar dê bơyai lơh drim ngai 16/6. Tàm pơrjum, yal mhar bè broă lơh roh bơta lơngăp lơngai tàm càr Dăk Lăk, Thiếu tướng Đặng Hồng Đức, Kwang atbồ Cơldŭ lơh broă Ƀộ Kwang àng đơs nền, tơnơ̆ tŭ broă ờ niam gơlik geh, Ƀộ Kwang àng neh sơrbac mhar ai ală mpồl lơh broă mờng chài, lam lơh dùl ròt ală broă wàng se, wềl, kơryan ală ù tiah geh gơ rềng, sền gàr anih lơh broă gơnoar atbồ, sền gàr lơngăp lơngai, ring lơngai ai làng bol in mờ wàng kup ală cau tờm lơh broă lơh tìs. Bal mờ hơ̆, mhar lam lơh broă dong kờl, di tŭ lùp còp, pơn dờm pơnđiang hìu bơnhă ală kwang bàng, cau ling kwang àng chơt phi să, gơtìp sồt să; lùp còp, pơn dờm pơnđiang hìu bơnhă kwang bàng, làng bol gơtìp chơt, sồt să.

Thiếu tướng Đặng Hồng Đức đơs loh, mờ nùs nhơm kràñ cê wàng kup gơtùi ală bol tờm lơh roh bơta lơngăp lơngai, tus tŭ do, mpồl kwang àng neh kup mờ bơsong rlau 50 nă cau tus bal tơn tàm broă do. Bơh lùp khàu sơn rờp, khà cau gơtìp kup uă ngan là cau kơnòm să, lam lơh broă jàñ bơsak tài gơtìp bơ chồt bơh tàm internet mờ gơtìp bơ chồt tam cah is đah cau Yoan mờ cau jơi bơtiàn dùl êt nă cau. Jơnau gơbàn broă do là tài bơh kai bơh ală bol sò tơm dê, 2, 3 nă cau Fulro kis lềng bơ chồt 2, 3 nă cau jơi bơtiàn dùl êt nă cau tam cah is cau Yoan mờ cau jơi bơtiàn dùl êt nă cau lơh roh bơta lơngăp lơngai mpồl bơtiàn mờ lơh gơbàn jơnau pơn rơ, lơh gơlik jơnau mpau ờ geh ngan kờñ geh ơm tàm lơgar ndai. Bơta do, mpồl Kwang àng gam pơn jat tai lùp khàu, lơh loh.

Bè gùng dà, broă lơh tàm tơngai tus, Thiếu tướng Đặng Hồng Đức đơs ngan, Ƀộ Kwang àng rơp pơn jat tai jòi kup jơh khà cau lơh gơlik broă lơh tìs. Mờ kung hơ pơrgon gàr lơngăp lơngai ai làng bol mờ mpồl tus bal wàng kup in; lam lơh broă lơh lùp khàu, lơh glài sơrbac mhar jat jơnau sồr. Ƀộ Kwang àng sồr ală kâp ủy, gơnoar atbồ càr Dăk Lăk, ală càr Tây Nguyên mờ tiah rềp bal sền gròi lam lơh niam broă lơh hòi jà làng bol, git loh nùs nhơm làng bol, ơm rềp làng bol, ơm bal mờ làng bol, di tŭ git gŏ ală bơta ờ suk tàm làng bol nàng bơsong bơh gờñ, bơsong bơh ngu rơyas tờm mờ tơnguh jơnau rơcang ngac làng bol dê tềng đap kai broă lơh aniai, bơ chồt, tam cah is mpồl tam klac gùt jơi bơtiàn bơh ală mpồl sò tơm pơlơ̆ dră dê, sơlơ tơnguh srơh jơh gùt làng bol sền gàr lơngăp lơngai dà lơgar.