Tơnơ̆ tŭ còp cơldŭ lơh tơrlòng lơh broă, Hìu sền sră Hìu bơsram Đại họk Việt- Đức dê, Kwang atbồ lơgar Đức geh jơnau đơs tềng đăp cau bơsram dờng, cau pơgru bơh hìu bơsram dê. Ồng tơngŏ bơta niam ngan tŭ tus còp lơgar Việt Nam, mơkung jờng rơ uă ngan gơnoar broă mờ bơta kwơmàng bơh Việt Nam dê tàm tiah do mờ tàm dunia. Kwang atbồ lơgar Đức đơs là Hìu bơsram Đại họk Việt- Đức là rơndăp broă lơh “đèng sòl gùng ” ai bơta gĭt gơ̆p đah 2 lơgar dê. Lơgar Đức rơ̆p pơn jat tai dong kờl lơgar Việt Nam tàm broă tơnguh uă broă lơh bơto bơtê mpồl cau lơh broă.

Di dơ̆ lòt còp, Ƀộ trưởng Ƀộ Lao động- Xã hội lơgar Đức kung neh tìp mat mờ cau bơsram dờng Hìu bơsram Đại họk Việt- Đức dê. Ală mpồl lơh sa kă bro lơgar Đức kung cribơyai mờ cau pơgru, cau bơsram dờng hìu bơsram dê bè jơnau kờñ sac rơwah cau lơh broă, sồr pal geh bè bơta pràn jak bơh cau bơsram dờng dê tŭ lik klờng.