Do là dơ̆ tus còp kấp Dà lơgar sơnrờp ngan tus lơgar Việt Nam bơh Kwang atbồ lơgar Hàn Quốk ồng Yoon Suk Yeol dê mờ lơgar Việt Nam kung là lơgar Đông Nam Á sơnrờp ngan Kwang atbồ lơgar Hàn Quốk ồng Yoon Suk Yeol tus còp tơnơ̆ mờ tŭ dờp guh at gơnoar tàm nhai 05 nam 2022.

Dơ̆ tus còp geh bơyai lơh tàm bơta git gơ̆p đah bàr lơgar tơnguh bơtàu niam bơnĕ. Bàr gah neh tơnguh kấp git gơ̆p tus broă lơh jŏ jòng tơl ală bơta tàm dơ̆ di tơnkah 30 nam crơng gơs bơta git gơ̆p lơh broă bal mờ lơgar ndai (nam 2022). Dơ̆ tus còp kung tơlik broă sền kwơ bơh Cíñ phủ lơgar Hàn Quốk bal mờ să tờm Kwang atbồ lơgar Hàn Quốk ồng Yoon Suk Yeol dê gơwèt mờ bơta git gơ̆p đah lơgar Việt Nam mờ lơgar Hàn Quốk. Dơ̆ tus còp lơgar Việt Nam do bơh Kwang atbồ lơgar Hàn Quốk dê geh kwơ màng là bal mờ lơgar Việt Nam, lơgar lơh broă bal tờm lơgar bơh lơgar Hàn Quốk dê, mùl màl sơn đờm lơh tơl “Bơceh lơh tam klăc đah lơgar Hàn Quốk mờ mpồl ASEAN dê (KASI).