Bình Dương ơm tàm mpồl lam lài gùt lơgar bè gơ hòi gơ jà priă bơcri bơh lơgar ndai mờ mờr 4 rơbô 200 rơndăp broă lơh, priă bơcri cih tàm sră pơ àr rlau 40 tơmàn dolar Mỹ; geh pơgap 65 rơbô mpồl lơh sa kă bro tàm lơgar mờ kờp jơh priă bơcri cih tàm sră pơ àr là 29 tơmàn 500 tơlak dolar Mỹ. Priă lơh geh kờp bal tơl nă cau bơh càr dê kung uă ngan rlau jơh gùt lơgar dê. Tŭ do, càr Bình Dương gam pơlam gùng dà bơtàu tơnguh lơh sa mờ măi mok jat gùng dà pa, ngăc ngar, rềp mềr mờ tiah ơm kis jat tàm 3 bơta tờm ngañ là: Gơnoar atbồ bơceh lơh- Làng bol lòt bal- Mpồl lơh sa kă bro lơh broă.

Đơs tàm dơ̆ lơh broă, Kwang atbồ Mpồl Lơh sa Dà lơgar ồng Trần Tuấn Anh jờng rơ uă ngan ală cồng nha niam ngan bè bơta bơtàu tơnguh lơh sa bơh càr Bình Dương dê, là bơta niam bơh gùt lơgar dê bè bơtàu tơnguh lơh sa pơlam gùng dà Xã hội củ nghĩa. Ală cồng nha dờng màng bơh càr Bình Dương dê neh geh ală tă pơgồp ờ dùl ết pơgồp bơnah lơh sir bè jơnau cih tàm sră pơ àr mờ bơta geh ngan bè bơtàu tơnguh rài lơh sa drà kă bro jat gùng dà pơlam Xã hội củ nghĩa bơh lơgar he dê tàm 40 nam do.