Nhai 09 nam 2023, tàm ƀòn dờng Pleiku, càr Gia Lai, Củ tịc lơgar Võ Văn Thưởng lòt còp mờ lơh broă tàm Ƀiñ đoàn 15, do là mpồl ling klàng geh mờr 40 nam lơh jăt kơnòl broă bơ̆t bơtàu ală tiah Lơh sa sền gàr dà lơgar tàm ù tiah kwơmàng Tây Nguyên.

Mờ đơs sùm, kơnhoàl ù tiah Tây Nguyên geh ù tiah dờng màng, là rơkàng hìu Đông Dương, Củ tịc lơgar sồr Ƀiñ đoàn 15 pơn jăt tai kơlôi sơnơng jrô nùs nhơm, gùng dà broă lơh ling klàng, sền gàr dà lơgar bơh Đảng, Quân ủy Dà lơgar, Ƀộ Quôk phòng dê, gĭt nền Broă rơndăp lơh sền gàr Dà lơgar tàm bơta pa, Kơrnoăt bơh Ƀộ Cíñ trị dê bè gùng dà broă lơh bơtàu tơnguh lơh sa- mpồl bơtiàn mờ sền gàr dà lơgar, lơngăp lơngai tiah Tây Nguyên tus nam 2030, wèt sền tus nam 2045. Pơgồp bal niam mờ kâp ủy, gơnoar ătbồ mờ làng bol tàm ù tiah do dê nàng jơh nùs lơh jăt ală kơnòl broă bơtàu tơnguh lơh sa- mpồl bơtiàn; gàr gơnoar broă lam lài lòt lài tàm tŭ lơh jăt ală kơnòl broă bơh tiah do dê là tiah mpồl ling lơh pôs đồng.

Nhai 8 nam 2023, Thủ tướng Phạm Minh Chính lơh broă mờ Mpồl duh broă sùm Tỉñ ủy càr Kon Tum bè broă lơh jăt kơnòl bơtàu tơnguh lơh sa mpồl bơtiàn. Thủ tướng Cíñ phủ Phạm Minh Chính jờng rơ broă lơh ngan mờ đơs niam cồng nha neh lơh geh bơh Đảng ƀộ, gơnoar atbồ, ling klàng mờ làng bol càr Kon Tum dê.

Tàm tơngai tus Thủ tướng sồr càr Kon Tum pal bơtàu tơnguh mhar, pràn, kơl jăp rơlao tai, pal gàr kơl jăp dà lơgar, bơta lơngăp lơngai tàm tiah kòn cau, jăt yàng, tiah nhàr dà lơgar mờ pal bañ lời gơtìp ờ thàn ni sơna bè bơta lơngăp lơngai kơ̆ kơl jăp cíñ trị. Bơ̆t bơtàu tiah do bè broă rơcang  lài tiah lơh broă bal lơh sa dunia, ring bal, niam bơnĕ, geh cồng nha mờ pal prăp gàr ngui niam geh bơta niam chài ờs mờng jơi bơtiàn kòn cau. Thủ tướng sồr tềng đăp măt pal tơrgùm ai lài broă kờp sền wơl ală jơnau kờñ, kơnòl broă nàng tơrgùm đơng lam, lam lơh, bơta pràn lơh jăt geh cồng nha, nam tơnơ̆ pal uă rơlao mờ nam lài mờ lơh ngan lơh geh mờ sơrlèt mờ ală jơnau kờñ neh geh ai.