Đơs tàm dơ̆ tìp măt, ồng Võ Văn Thưởng, Kwang geh jơng tàm Ƀộ Cíñ trị, Thường trựk Ƀan Ƀí thư đơs tờm, dơ̆ tìp măt tơlik broă sền gròi uă ngan bơh Đảng, Dà lơgar dê gơwèt mờ gah khoa họk mờ kông nghệ, bơto bơtê mờ bơsram, bơta chài rơgơi, đơs crih tamya.

Dờp mờ pơn jờng, broă lơh dờng màng, bơta pơgồp bal bơh mpồl cau ngăc ngar, cau khoa họk, cau chài đơs crih tamya tàm broă bơ̆t bơtàu mờ sền gàr Dà lơgar, mờ pơn jăt tai pơlam, lam sồr, tơnguh nùs nhơm tam klăc bal, ring bal tàm jơnau kơlôi sơnơng, broă lơh bơh mpồl cau ngăc ngar, cau khoa họk, cau chài đơs crih tamya tàm broă bơto bơtê, bơta chài rơgơi, đơs crih tamya bơh dà lơgar dê, pơgồp bal tàm broă lơh geh cồng nha Nghị quyết Pơrjum dờng Đảng Dà lơgar dơ̆ XIII.